Сардоба туманида сув омбори девори бузилиши оқибатида рўй берган сув тошқини туфайли вилоятнинг Мирзаобод туманидан 2 мингдан ортиқ киши Янгиер шаҳрига эвакуация қилинди.
Янгиер шаҳар ҳокимлиги матбуот хизматининг хабар беришича, вақтинчалик эвакуация қилинган мирзаободликлар Янгиер педагогика ҳамда тиббиёт коллежлари, ГулДУнинг Янгиер шаҳридаги педагогика факультети ва Янгиер Футбол академияси биносига жойлаштирилган.
«Қайд этиш жоизки, мана шундай шароитда бир қанча тадбиркорлар, саховатпеша инсонлар ва ҳомийлар томонидан эвакуация қилинган фуқароларга зарурий озиқ-овқатлар, ичимлик суви, ниқоб, антисептик восита, бир марталик қўлқоплар ва бошқа тиббиёт воситалари етказиб берилмоқда. Шунингдек, Гулистон туман ҳокимлиги томонидан ҳам озиқ-овқат маҳсулотларидан иборат ҳомийлик ёрдами келтирилди», — дейилади хабарда.
Шунингдек, Ховос туман ҳокимлиги ҳам эвакуация қилинган аҳолини қабул қилиш бўйича барча шарт-шароитлар яратилаётганини маълум қилган. Улар сардобалик аҳолини тумандаги Болалар ва ўсмирлар спорт мактаби, Болалар мусиқа ва санъат мактаби ҳамда туман марказидаги барча умумтаълим мактабларига жойлаштирмоқда.
Айни дамда 3300 нафар аҳоли учун жойлар тайёрланган бўлиб, уларни доимий равишда озиқ-овқат маҳсулотлари билан таъминлаш кўзда тутилган.
Мавзуга доир: Шавкат Мирзиёев: Шароит яхши бўлмагунича, бирорта раҳбар, мен бошчилигимда, ҳеч қаёққа кетмайди
Ҳодиса жойига зудлик билан бош вазир Абдулла Арипов ва Президент Шавкат Мирзиёев етиб борган. Президент маҳаллий жамоатчилик вакиллари билан учрашиб, суҳбатлашган.
Изоҳ (0)