Мажбурий ижро бюросининг Чортоқ тумани бўлими тезкор шўъбаси ходимлари томонидан 2020 йилнинг 28 февраль куни ўтказилган тадбир давомида хусусий корхона раҳбари У.С. корхона номига расмийлаштирилган электр ҳисоблагични ноқонуний равишда ўзгартиргани аниқланди. Бу ҳақда «Дарё»га Мажбурий ижро бюроси маълум қилди.
Хабар берилишича, тадбиркорга қарашли умумий овқатланиш шохобчасида ўтказилган тезкор тадбирда белгиланган талабларга зид равишда корхона номига расмийлаштирилган электр ҳисоблагич ўзбошимчалик билан бошқа ҳисоблагичга алмаштирилиб, ундан фойдаланиб келинганлиги аниқланган.
Маълум бўлишича, У.С. корхона номига расмийлаштирилган электр ҳисоблагични ўзбошимчалик билан бошқа ҳисоблагичга алмаштириб, ундан фойдалангани натижасида таъминотчи корхона манфаатларига 59,2 миллион сўм миқдорида зарар етказилган.
Мазкур ҳолат бўйича корхона раҳбарига нисбатан Ўзбекистон Республикаси Жиноят кодексининг 185-2-моддаси 2-қисми (Электр, иссиқлик энергияси, газ, водопроводдан фойдаланиш қоидаларини бузиш) билан жиноят иши қўзғатилди.
Аввалроқ Сирдарёда электр энергиясидан ноқонуний фойдаланиб, балиқчилик билан шуғулланган балиқчилик хўжалиги иш юритувчиси электр тармоқлари корхонаси манфаатларига 120 миллион сўм миқдорида зарар етказганлиги аниқланганди.
Изоҳ (0)