Ўзбекистонда пандемия даврида, яъни 2020 йилнинг 15 мартидан бугунги кунга қадар тез тиббий ёрдам хизматига аҳоли томонидан қарийб 1,5 миллион та мурожаат бўлди. Бу ҳақда Соғлиқни сақлаш вазирлиги хабар берди.
Маълум қилинишича, мазкур кўрсаткич мамлакат бўйича кунига ўртача 30 мингдан зиёд чақириқ тушганини кўрсатади. Ҳозирда республика бўйлаб кунига 2 ярим мингта бригада тун-у кун фаолият олиб бормоқда.
Ушбу бригадалар пандемия даврида коронавирус инфекциясида гумонланган инсонларни карантинга жойлаштириш, ушбу касалликка чалинган беморларни махсус шифохоналарга етказиш бўйича фаолият юритмоқда. Бундан ташқари, аҳоли томонидан йўлланган чақириқ манзилларига ўз вақтида етиб бориш, зарур тез тиббий ёрдам кўрсатиш, оғир беморларни шифохоналарга етказиш борасида ҳам иш олиб борилмоқда.
Қайд этилишича, айни пайтда автомобиллар паркининг кенгайиши, тез ёрдам бригадалари дислокацияси қайта кўриб чиқилиб, аҳоли яшаш пунктларига яқинлаштирилиши туфайли чақириқларга кечикиб бориш каби қатор муаммолар ҳам бартараф этилди.
Вазирлик томонидан маълум қилинишича, охирги уч йил ичида тез тиббий ёрдам хизматига ажратилаётган маблағ ҳам бир неча баробар ошди. Жумладан, битта чақириққа тез тиббий ёрдам кўрсатиш мақсадида ишлатиладиган дори воситалари учун 2016 йилда 800 сўм маблағ ажратилган бўлса, ҳозирда ушбу кўрсаткич 5800 сўмни ташкил қилмоқда.
Ўзбекистонда коронавирус инфекциясига чалинганлар сони эса 30 апрель соат 10:00 ҳолатига кўра, 2017 нафарга етди. Касалликдан 1133 киши тузалишга муваффақ бўлди. 15 мартдан буён коронавирусга чалинган беморларнинг тўққиз нафари вафот этди, Мамлакатда 28 апрелдан буён соғайганлар сони айни вақтда касалликдан даволанаётганлар сонидан кўп бўлиб турибди.
Изоҳ (0)