Ўзбекистондаги айрим оммавий ахборот воситаларида мактабларда имтиҳонлар бекор қилингани ҳақида маълумот тарқалди. Халқ таълими вазирлиги бу хабарлар ҳақиқатга тўғри келмаслигини маълум қилди.
Қайд этилишича, Республика комиссияси, Халқ таълими вазирлиги ва тегишли давлат ташкилотлари 5—11-синф ўқувчилари учун босқичли назорат ва якуний давлат имтиҳонларини ўтказиш ёки бекор қилиш масаласини муҳокама қилмоқда.
Вазирлик махсус ҳукумат комиссиясининг бу масаладаги қарорини ўз каналлари орқали маълум қилишини билдирган ва ўқувчиларни «Онлайн мактаб» каналларида намойиш этилаётган телевизион дарслар орқали билим олишда давом этишга чақирган.
Эслатиб ўтамиз, Ўзбекистонда коронавирус аниқланганидан кейин барча таълим муассасалари ёпилган. Мактаб ўқувчилари учун бир қатор телеканалларда видеодарслар эфирга узатилмоқда. Карантин вақтида теледарслар ўтаётган ўқитувчилар Тошкентдаги Президент мактабига жойлаштирилган.
Карантиннинг қачон тугаши эса номаълум. У Республика махсус комиссияси қарорига кўра амалга оширилади. Ушбу комиссия қарори билан карантин муддати 2020 йил 10 майигача узайтирилган эди.
Аввалроқ мактабларда жорий ўқув йили онлайн мактаб лойиҳаси доирасида якунланиши ҳақида хабар берилган эди.
Мавзуга доир:
- Ўзбекистон таълим муассасаларидаги санитария меъёрлари қайта кўриб чиқилади
- Мактаб дарсликларини Тошкентда қолдириб, вилоятларга кетган ўқувчиларни баҳолаш қандай амалга оширилади? ХТВ жавоб берди
- Таълим инспекцияси: «Ўзбекистондаги 731 та умумий ўрта таълим мактабининг битирувчиларга аттестат бериш ваколати йўқолиши кутилмоқда»
Изоҳ (0)