Фарғона вилояти Қувасой шаҳрида карантин қоидаларини бузиб, севгилиси билан учрашмоқчи бўлган маст йигит 15 суткага қамалди. Бу ҳақда Олий суд матбуот хизмати хабар берди.
Маълум қилинишича, фуқаро Т.Д 20 апрель куни соат 21:00 да карантин қоидаларини бузиб, маст ҳолда Қувасой шаҳар А.Азизов кўчасида ниқоб тақмасдан юрган. Шунингдек, фуқаро карантинга олинган ҳудуд ўралган тасмани узиб ташлаган. Шу ерда жамоатчилик асосида хизмат олиб бораётган А.Х. томонидан тартибга чақирилганда, фуқаро Т.Д. уятли сўзлар билан уни ҳақоратлаган.
Муқаддам безорилик қилганлиги учун судланган Т.Д. севган қизининг хонадонига кетаётганлигини важ қилиб, бақир-чақир қилган ва фуқароларнинг осойишталигини бузган.
Таъкидланишича, Т.Д. Қувасой шаҳар ИИБ профилактика инспектори М.Қ.нинг ҳуқуқбузарликни тўхтатиш, жамоат тартибига риоя қилиш ва ИИБ биносига бориш ҳақидаги қонуний талабларига бўйсунмасдан, унга қаршилик кўрсатган.
Мазкур ҳолат Қувасой шаҳар маъмурий судида кўриб чиқилди. Ҳуқуқбузар Т.Д.га нисбатан Маъмурий жавобгарлик тўғрисидаги кодексининг тегишли моддаларига асосан 15 сутка маъмурий қамоқ жазоси тайинланди. Шунингдек, ҳуқуқбузардан давлат фойдасига маъмурий қамоқ харажатлари учун 501 750 сўм ундирилиши белгиланди.
Изоҳ (0)