Жорий йилнинг 16 мартидан бошлаб болаларни давлат мактабгача таълим ташкилотларига қабул қилиш бўйича йўлланмаларни шакллантириш ва берилиши вақтинча тўхтатилган. Бу ҳақда 28 апрель куни АОКАда бўлиб ўтган брифингда Мактабгача таълим вазирлиги ахборот хизмати раҳбари Дилафрўз Икромова айтиб ўтди.
Дилафрўз Икромованинг таъкидлашича, фуқаролар давлат мактабгача таълим ташкилотларига болаларни қабул қилиш тўғрисидаги йўлланмаларни олиш учун фақат Давлат хизматлари марказлари ёки Ягона интерактив давлат хизматлари портали орқали мурожаат қилишлари мумкин бўлади.
«Лекин 2020 йил 16 март кунидан бошлаб республикада коронавирус инфекциясининг профилактикаси ва унга қарши курашиш тадбирлари якунига етгунига қадар болаларни давлат мактабгача таълим ташкилотларига қабул қилиш бўйича йўлланмаларни шакллантириш ва берилиши тўхтатилган. Каратиндан аввалги навбатлар карантин даврида ўзгаришсиз қолади ва карантин тугагандан сўнг ўз навбатида давом этади», — деди у.
Эслатиб ўтамиз, Ўзбекистонда коронавирус билан касалланиш ҳолатлари аниқланган сабабли барча таълим муассасалари карантин учун ёпилган. Аввалроқ Бандлик ва меҳнат муносабатлари вазирлиги боғча болалари ва бошланғич синф ўқувчилари ота-оналарига таътил берилиши тартибларини баён қилганди.
Изоҳ (0)