Ҳиндистон талабаларни Ўзбекистондаги тиббий олийгоҳда ўқимасликка чақирди

Ҳиндистонда талабаларга Марказий Америкадаги учта ва Ўзбекистондаги битта тиббиёт университетида таҳсил олмаслик қатъий тавсия қилинди. Ҳиндистон Миллий тиббий комиссияси абитуриентларга огоҳлантириш берди. Бу ҳақда The New Indian Express  хабар берди.

Бу муассасалар Ҳиндистоннинг тиббий таълим стандартларига жавоб бермаслиги маълум қилинган. Қуйидаги университетларда таҳсил олмаслик тавсия қилинмоқда:

• Марказий Америка соғлиқни сақлаш ва фанлар университети, Белиз;
• Колумбия Марказий университети, Белиз;
• Вашингтон соғлиқни сақлаш ва фанлар университети, Белиз;
• Тошкент давлат тиббиёт университети Чирчиқ филиали, Ўзбекистон.

Огоҳлантириш Ҳиндистоннинг Мексикадаги элчихонаси ва Ташқи ишлар вазирлигининг Евросиё бўлими томонидан жиддий хавотирлар билдирилгач эълон қилинган. Улар юқоридаги университетларда зарур академик ва клиник стандартлар йўқлигини таъкидлаган.

Шунингдек, тиббиёт муассасаларида зарур инфратузилма йўқлиги, талабалардан ҳаддан ортиқ тўловлар олиниши, ўқув шароити ва таълим сифати борасида ёлғон маълумотлар берилгани айтилмоқда. Баъзи талабалар ўқишни тарк этмоқчи бўлганда, уларга босим ўтказилган.

Чет элда тиббиёт бўйича ўқиётган ҳиндистонликлар Хорижий тиббиёт битирувчиси лицензиати (FMGL) қоидаларига қатъий риоя қилиши зарур. Бу қоидалар курс давомийлиги, ўқув дастури, таълим тили, клиник тайёргарлик ва амалиётни қамраб олади. Ушбу шартларни бажармаслик Ҳиндистонда тиббиёт билан шуғулланиш учун рўйхатдан ўтишни рад этишга олиб келиши мумкин.

Ўзбекистонда тиббий таълим олаётган ҳиндистонлик талаба шикояти

Февраль ойидан бошлаб Тошкент тиббиёт академиясида ўқишни бошлаган 21 ёшли ҳиндистонлик талаба дарслар, имтиҳонлар ва ётоқхонадаги шароитлардан шикоят қилган эди.

Унга кўра, ўқитувчилар инглиз тилида зўрға гапиради, профессорлар сифатсиз таълим беради, имтиҳонлар жавоби эса олдиндан ёдлатилади. У ётоқхона жирканч аҳволда экани, хожатхона ойда бир тозаланиши, ҳамма ёқни мозор босиб кетганига ҳам тўхталганди.

Танқиддан сўнг олий таълим вазири Қўнғиротбой Шарипов Тошкент тиббиёт академиясига бориб, ҳиндистонлик талабалар билан учрашган.

“Суҳбат давомида талабалар университетда яратилган замонавий шарт-шароитлардан мамнун эканликларини, таълим сифати, профессор-ўқитувчилар билан мулоқот ва яшаш имкониятлари борасида ижобий фикрларни билдирди”, дея хабар берган вазирлик.

Вазир университет раҳбариятига хорижлик талабалар учун қулайликларни кўпайтириш бўйича топшириқлар бергани таъкидланган.