Туркиянинг “Фенербаҳче” клуби бош мураббийи Жозе Моуриньо фаолиятини терма жамоада давом эттириш истагини билдирди. Бу ҳақда Sport-Express нашри хабар берди.
Унга кўра, португалиялик мутахассис айнан ўз ватанининг жамоаси билан Жаҳон чемпионатида иштирок этишни орзу қилаётганини таъкидлади:
Мен Жаҳон чемпионатида иштирок этишни истайман — бу Португалия билан бўладими ёки бошқа мамлакат биланми, ҳозирча номаълум. Аммо бу Португалия бўлиши керак, деб ўйлайман. Ўзимни федерацияга таклиф қилмаяпман, ҳаммаси табиий йўл билан бўлиши керак. Ишонаманки, бир кун бу содир бўлади, — деди Моуриньо Canal 11 телеканалига берган интервьюсида.
Қайд этиш жоизки, 2030 йилги Жаҳон чемпионати айнан Моуриньо ватани Португалия, шунингдек, Испания ва Марокашда ўтказилади. Мусобақа 13 июндан 21 июлгача давом этади. Шунингдек, турнир доирасида Уругвай, Аргентина ва Парагвай мезбонлик қиладиган учта баҳс ҳам белгиланган.
Эслатиб ўтамиз, ҳозирда Португалия терма жамоасини 52 ёшли испаниялик мутахассис Роберто Мартинес бошқармоқда.
Маълумот учун, Жозе Моуриньо мураббийлик фаолияти давомида “Порту”, “Челси”, “Интер”, “Реал Мадрид”, “Манчестер Юнайтед”, “Тоттенҳэм” ва “Рома” каби клубларни бошқарган ва улар билан кўплаб совринларга эга чиққан.
Изоҳ (0)