Ўзбекистонда 28 апрель куни коронавирусга чалинган яна 25 бемор буткул тузалиб, соғайганлар 934 нафарга етди, деб хабар бермоқда ССВ матбуот хизмати.
Қайд этилишича, Тошкентдаги Вирусология илмий-текшириш институти клиникасидан 21 нафар, Эпидемиология, микробиология ва юқумли касалликлар илмий-текшириш институти клиникасидан 4 нафар, жами 25 бемор буткул соғайди. Улар Соғлиқни сақлаш вазирлиги масъуллар иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Вирусология илмий-текшириш институти клиникасида соғайганларнинг 15 нафари Тошкент шаҳридан, 6 нафари Тошкент вилоятидан. Улардан 2 нафари Туркиядан, яна 1 нафари Россиядан, яна 1 нафари Англиядан келишган ва карантинга олинган. Коронавирус аниқлангач, клиникага ётқизилган. Қолган 17 нафари коронавирус инфекциясига чалинганлар билан мулоқот орқали касалликни юқтириб олган. Беморлардан 9 нафари эркак, 12 нафари аёл. Улар орасида энг ёши каттаси 66 ёшда бўлса, энг ёши кичиги 20 ёшда.
Эпидемиология, микробиология ва юқумли касалликлар илмий-текшириш институти клиникасида соғайганларнинг барчаси Тошкент шаҳридан бўлиб, коронавирус инфекциясига чалинганлар билан мулоқотда бўлиб, касалликни юқтириб олишган. Уларнинг 1 нафари эркак, 3 нафари аёл бўлиб, энг ёши каттаси 72 ёшда бўлса, энг ёши кичиги 28 ёшда.
Вазирлик хабарида айтилишича, мазкур клиникага 30 март куни коронавирусга чалинган 72 ёшли бемор жуда оғир аҳволда олиб келинган. Узоқ вақт сунъий нафас олдириш аппаратида бўлган бемор даволаш муолажаларидан кейин инфекциядан тўлиқ тузалган, бироқ бошқа ҳамроҳ касаллиги борлиги сабабли ихтисослашган шифохонага реабилитация учун ўтказилган.
Ўзбекистонда 28 апрель соат 14:00 ҳолатига кўра, коронавирус инфекциясини юқтириб олганлар сони 1939 нафарни ташкил қилмоқда.
Изоҳ (0)