Песков Путин коронавирус билан боғлиқ вазият юзасидан навбатдаги мурожаатни йўллаши ҳақидаги хабарларни инкор этмади

Россия президенти Владимир Путин келаси ҳафтада мамлакатдаги коронавирус билан боғлиқ вазият юзасидан янги баёнот билан ОАВда чиқиш қилиши мумкин. Бу ҳақда «Россия 1» телеканалидаги «Москва. Кремль. Путин» кўрсатувида президент матбуот котиби Дмитрий Песков маълум қилган, деб ёзмоқда «РБК».

«Менимча келаётган ҳафтада (27 апрель — 3 май) давлат раҳбари мамлакатдаги вазият юзасидан янги баёнот билан чиқиш қилади», — деган Песков.

Унинг қўшимча қилишича коронавирус сабаб Россияда жорий этилган карантин чекловларидан чиқиш босқичма-босқич амалга оширилади ва ушбу жараён тартиби ҳали ишлаб чиқилмаган.

24 апрелда Песков ишланмайдиган кунларнинг узайтирилиши ҳақида гапиришдан аввал уларнинг жорий даври якунланишини кутиш лозимлигини айтганди. Шунингдек, Федерация кенгаши спикери Валентина Матвиенко карантин тақиқлари қачон бекор қилиши борасида аниқ фикр билдириш қийинлигини таъкидлаган.

Тахминларга кўра, Россия ҳукумати «ўзини яккалаш» тартибини май ойидаги байрамлар ўтадиган даврларгача узайтиради, байрамлардан аввалги ва кейинги кунлар ҳам ишланмайдиган кунларга айланади. Ушбу чеклов орқали касалликнинг иккинчи тўлқини жиддий бўлмаслигини таъминлаш мумкин. Яна бир тахминга кўра, карантин май ойи ўрталаригача ёки кўпи билан июнь бошига қадар узайтирилиши кутилмоқда. Кейинчалик Москва вилояти губернатори Андрей Воробёв ҳам карантиннинг майдаги байрамлар ўтгунича узайтирилиши ҳақида гапирган.

Россия бош санитар врачи Анна Попованинг таъкидлашича мамлакатда ҳали ҳам COVID-19 юқтириб олиш ҳолатлари бўйича хавф даражаси юқори, шу сабабли «ўзни яккалаш» тартиби яна икки ҳафтага узайтирилади.

Владимир Путин 2 апрель куни коронавирус сабабли Россияда ишланмайдиган кунларни 30 апрелгача узайтирган.