Туркманистонда COVID-19 пандемияси фонида ҳам аҳоли Рамазон ойида масжидларга боришни давом эттирмоқда. Бу ҳақда «РИА Новости» хабар бермоқда.
Мамлакатдаги мусулмонларнинг айтишича, улар масжидларга мунтазам ташриф буюрмоқда, барча диний тадбирлар одатий тарзда ўтказилмоқда, коронавирус пандемияси туфайли ҳеч қадай чекловлар йўқ. Уларнинг сўзларига кўра, одамлар бемалол жума намозлари, таровеҳ намозларида қатнашиши мумкин.
Қайд этилишича, Рамазон ойининг биринчи кунида Туркманистон президенти Гурбангули Бердимуҳамедовнинг ўзи намуна бўлиб, Ашхободдаги «Ҳазрати Умар» масжидида ўзи ёзган китоблар савдосидан тушган пулга хайрия сифатида ифторлик қилиб берган. Маҳаллий телеканалда намойиш этилган кадрларга кўра, унда 100 га яқин одам иштирок этган.
Ўзбекистонда эса Рамазон ойидаги таровеҳ намозларини уйда ўқиш тавсия қилинган. Тожикистон, Қозоғистон, Қирғизистонда ҳам шу турдаги чеклов чоралари қабул қилинган.
Маълумот учун, Туркманистонда коронавирус расман қайд этилмаган. Ҳукумат мамлакатда касаллик йўқлигини таъкидламоқда. 23 апрель куни Туркманистон ташқи ишлар вазири Рашид Мередев ҳам мамлакатда COVID-19 билан касалланганлар йўқлигини эълон қилган. Кўплаб материалларда бунга карантин чоралари вақтида қўлланилгани сабаб қилиб кўрсатилмоқда. Шу билан бирга, расмий ОАВ ушбу чоралар ҳақида батафсил маълумот бермаган.
Ғарбда ушбу ҳаракат ахборотни яшириш эканлиги ҳақида очиқ гапирилмоқда. Россияда ҳам Туркманистон ҳукуматининг берган маълумотига шубҳа билан қаралмоқда, бироқ бу борада расмий муносабат билдирилмаган. Шунингдек, ОАВда Туркманистонда етти кишида коронавирус аниқлангани, касалликдан бир киши вафот этгани, марҳум ҳақидаги маълумотлар қатъий сир сақланаётгани ҳақида хабарлар тарқалган эди.
Изоҳ (0)