G20’га кирувчи давлатларнинг етакчилари иштирокида 24 апрель куни ўтказилиши керак бўлган видеоконференция сўнгги дақиқаларда АҚШ ва Хитойнинг Жаҳон соғлиқни сақлаш ташкилоти борасидаги тортишуви сабаб қолдирилган. Бу ҳақда The South China Morning Post учрашувни ташкиллаштиришга тайёргарлик кўрган манбасига таяниб хабар берди.
Маълумотларга кўра, Вашингтон ЖССТдан COVID-19 коронавирус инфекциясига қарши қўллаган дастлабки чоралари тўғрисида ҳисобот беришини талаб қилган. Ўз навбатида Пекин ташкилот фаолиятининг суриштирувини муҳокама қилишдан бош тортган.
«Шу сабабли конференция сўнгги дақиқаларда бекор бўлди», — дейди манба. Бироқ томонлар кейинчалик ЖССТ борасида муросага келиши ёки якуний баёнотда ташкилотга доир бирор қарорда тўхталишини рад этмаган.
Таъкидланишича, АҚШ президенти Дональд Трамп ва Хитой раиси Си Цзиньпин иштирокида иккинчи видеоконференция ўтказиш режалари ҳақида расман маълумот йўқ.
24 апрель куни COVID-19 профилактикаси ва уни даволаш, ташхиси учун хавфсиз ва самарали вакцина ҳамда хавфсиз тестларни ишлаб чиқаришга бағишланган онлайн-йиғилишда Франция президенти Эммануэль Макрон, Германия канцлери Ангела Меркель ва Жанубий Африка Республикаси президенти Сирил Рамафоса иштирок этган. Бироқ бир қатор давлатлар, шу жумладан, АҚШ, Хитой, Ҳиндистон ва Россия бу тадбирда қатнашмаган.
Аввалроқ АҚШнинг G20’даги вакили мамлакат конференцияда қатнашмаслигини билдирган. Шу билан бирга, у Вашингтоннинг соғлиқни сақлаш, шу жумладан, коронавирус билан боғлиқ вазиятга қизиқиши ҳақида шубҳа бўлмаслиги кераклигини таъкидлаган. Вакилнинг таъкидлашича, АҚШ томони ЖССТнинг фаолиятидан хавотирда, чунки унинг жиддий муваффақиятсизликлари пандемиянинг кучайишига сабаб бўлган.
Мавзуга доир: ЖССТ вакили коронавирус билан боғлиқ ўлим ҳолатларининг ҳисоб-китоби қандай олиб борилаётганини тушунтирди
Изоҳ (0)