Хитой ҳукумати соғлиғида муаммо бўлиши мумкин бўлган Шимолий Корея етакчиси Ким Чен Инни тиббий кўрикдан ўтказиш учун Пхеньянга тиббиёт мутахассислари ҳам бўлган махсус делегация юборди. Бу ҳақда Reuters агентлиги хабар бермоқда.
Шимолий Кореянинг Daily NK нашри Ким Чен Инда 12 апрель куни юрак-қон томир тизимига боғлиқ жарроҳлик амалиёти ўтказилгани, ҳозирда КХДР етакчиси соғлиғини қайта тиклаётганини маълум қилганди.
Reuters’га кўра ушбу делегацияга Хитой Коммунистик партияси (ХКП) Ташқи алоқалар бўлимининг юқори лавозимдаги амалдори раҳбарлик қилмоқда. Улар Пекиндан КХДРга 23 апрель куни жўнаб кетган.
Бироқ ХКП Марказий қўмитаси халқаро алоқалар бўлими ва Хитой Ташқи ишлар вазирлиги ушбу ташриф ҳамда Шимолий Корея етакчиси соғлиғи ёмонлашгани ҳақидаги миш-мишларга ҳозирча ҳеч қандай изоҳ бермаган.
Аввалроқ CNN телеканали АҚШ КХДР етакчиси Ким Чен Иннинг соғлиғи жарроҳлик амалиётидан сўнг ёмонлашгани тўғрисидаги разведка маълумотларини ўрганаётганини маълум қилганди. Президент Дональд Трамп эса Ким Чен Иннинг соғлиғи ёмонлашгани тўғрисидаги хабарларга жавоб берар экан, CNN’га унчалик ишонмаслигини билдирган.
Маълумотларига кўра, Шимолий Кореяда 2019 йилдан буён ҳокимиятни топшириш учун фавқулодда режа тайёрланмоқда. Мамлакат тепасига амалдаги раҳбар Ким Чен Иннинг ўрнига унинг синглиси Ким Ё Чжон келиши мумкин.
Изоҳ (0)