Австралиялик 8 ёшли бола Корона Де Врис исми коронавирусга яқин талаффуз қилингани сабабли мактабдошлари уни масхара қилаётганидан шикоят қилиб, актёр Том Хэнксга хат ёзди. Бу ҳақда Англиянинг 7 news канали хабар берди.
Қайд этилишича, актёр боланинг мактубини эътиборсиз қолдирмаган, ҳатто унга совға ҳам юборган.
«Мен сиз ва рафиқангиз вирус юқтирганингиз ҳақида эшитдим. Ўзингизни қандай ҳис этяпсиз? Исмим ўзимга ёқади, лекин мактабдагилар мени коронавирус деб атаяпти. Бундан мен хафа бўляпман, жаҳлим чиқяпти», — деб ёзади Корона исмли бола.
Бироздан сўнг Корона қуйидагича жавобни олди:
«Қадрли дўстим Корона, сенинг мактубинг рафиқам иккимизни хурсанд қилди. Сенинг шундай яхши дўст эканлигинг учун раҳмат! Дўстлар оғир дамларда бир-бирини қўллаб-қувватлайди.
Мен сени телевизорда кўрдим, мен аллақачон уйга — АҚШга қайтган ва соғайиб кетган бўлсам ҳам, сенинг мактубингдан сўнг аҳволим янада яхшиланди. Биласанми, мен биладиган ягона Корона исмли бола сенсан».
Шунингдек, Хэнкс болага совға жўнатганини ҳам қўшимча қилган.
«Ўйлайманки, сенга ушбу ёзув машинкаси ёқади. Катталардан уни қандай ишлатишни сўра ва менга жавобингни у ёрдамида ёз», — деб ёзган актёр.
Том Хэнкс ўз мактубини машинкада ёзган, охиридаги «Мен сенинг дўстингман! Яна бир бор раҳмат!» деган сўзларни эса қўлда ёзган.
Гап Cоrona маркаси остида ишлаб чиқарилган ёзув машинкаси ҳақида кетмоқда. Хэнкс коронавирусни юқтириб олганида унинг расмини Instagram’даги саҳифасига жойлаштирган эди. Том Хэнкс ва унинг рафиқаси март ойининг бошида коронавирусни бошдан кечирган эди.
Мавзуга доир: Том Хэнкс коронавирусга қарши вакцина учун қон берди
Изоҳ (0)