«This website will self destruct» — шундай сайтки, агар 24 соат мобайнида у орқали ҳеч ким хат жўнатмаса, ўзини «йўқ қилади», деб ёзади Meduza.
Исталган киши сайтга кириши ва махсус саҳифада ишлари қандай эканлиги ёки шу дамда уни нима ташвишлантираётгани ҳақида ёзиши мумкин. Хат жўнатилганидан сўнг у умумий базага тушади ҳамда уни бошқалар ҳам кўриши мумкин бўлади. Бошқа фойдаланувчилар хат мазмуни билан таниша олади, унинг ким томонидан ёзилгани эса сир тутилади.
Сайтда иккита тугма бор, бири турли мамлакатлардаги руҳий қўллаб-қувватлаш марказлари телефон рақамлари, иккинчиси эса тасодифий хатларни базадан танлаб, экранга олиб чиқади.
Сайт ташриф буюрувчилари карантиндан нолиб хатлар ёзмоқда. Кимдир ота-онасини, бошқа биров севгилисини кўра олмаётганидан шикоят қилган. Айримлар ҳазиллар ёзиб, одамларнинг кайфиятини кўтаришга ҳаракат қилмоқда, яна кимдир ёз учун режалари билан ўртоқлашган.
Яна бир фойдаланувчи хавотир ҳиссини камайтириш учун ичкиликка ружу қўйгани, бироқ вазият янада ёмонлашганини ёзган. У, албатта, ўзини қўлга олишга сўз берган ҳамда хатини ўқиганларга миннатдорчилик билдирган.
Лойиҳа муаллифларига кўра, сайт яратилганидан сўнгги биринчи дам олиш кунлари мобайнида сайтга 15 мингдан ортиқ киши хат ёзган. Бу хатларни умумий ҳисобда миллион мартадан кўпроқ ўқишган.
«Одамлар ҳозир уйга қамалиб қолди. Фикримча, ҳозир айрим инсонлар ҳис-туйғуларини уялмай изҳор этиши учун уларга қўллаб-қувватлов зарур. Шунинг учун ҳам мен бу сайтни яратишга қарор қилдим», — деб ёзади сайт яратувчиси.
Изоҳ (0)