2020 йилнинг ёзида қандай рангдаги кийимлар урфда бўлади?

Янги мавсумга тайёргарлик кўриш ва гардеробни янгилашни истаяпсиз-у, лекин нимадан бошлашни билмаяпсизми? Унда ишни либосларингиз орасига аввал кийиб кўрмаган рангларни қўшишдан бошланг. Айнан қайси рангни танлашни билмаётган бўлсангиз, унда сиз учун ёз фаслида урфда бўлиши кутилаётган ранглар ҳақида маълумот бериб ўтамиз.

Сиёҳ ранг

Мода танқидчилари ёз мавсумида сиёҳ ранг урфда бўлишини инкор этмаслиги аниқ. Машҳурлардан Перис Ҳилтон ушбу рангни яхши кўради, унинг гардеробида бир қанча сиёҳ рангдаги либосларни учратиш мумкин. Жазирамада ҳаво ўтказадиган сиёҳ ранг шифон ёки креп матоли кўйлакдан яхши вариант йўқ.

Мовий

Ушбу рангнинг асабларни тинчлантириши, хотиржамликни ҳис қилишга туртки бериши ранглар психологиясида исботини топгани сир эмас. Дизайнерлар мазкур рангни ёз мавсумида урфда бўлишини таъкидлаган ҳолда уни оқ, сариқ ва бошқа ёрқин ранглар билан мослашни тавсия қилади.

Аёл ва қизларнинг севимли ранги бўлган пушти ёз фаслида олдингидан-да кўпроқ долзарб бўлади. Фақат кўзни олмайдиган, тў​қ бў​лмаган пушти либосларни гардеробингизга қўшинг. Ушбу ранг билан фақат нозик образлар яратишингиз шарт эмас, аксинча, крассовка ёки сандаллар билан мослаб, ҳеч кимга ўхшамаган, ўзига хос услубда кийинишга ҳаракат қилинг.

Оч сариқ

2020 йилда сариқ рангдаги ҳар қандай либос ва аксессуар долзарб, бироқ ушбу рангдан либос кийганда тери рангига ярашадими, йўқми, шу каби жиҳатларга эътибор қаратиш керак. Танлов борасида боши қотганларга, оч лимон рангидан кофта-юбка кийиб, винтаж услубидаги аксессуар тақиш маслаҳат берилади.

Оч олов ранг

Аввалги мавсумда тўқ олов ранг урфда бўлган бўлса, мазкур мавсумда оч олов ранг трендда бўлади. Ноодатий услубда кийинишни истаган, лекин нимадан бошлашни билмаётганларга ранглар билан фантазия қилиш тавсия қилинади. Масалан, олов ранг ва сиёҳ рангларни бир-бирига мослаш орқали эсда қоларли образ яратиш мумкин.

Писта ранг

Мазкур ранг мана бир неча мавсумдирки долзарблик борасида етакчилик қилмоқда. Айниқса, Jacquemus, Area вa Tod’s коллекцияларида мазкур рангдаги либосларни учратиш мумкин.

Классик кўк

Ранглар ва унинг турли соҳаларга (мода, полиграфия, дизайн, реклама) таъсирини ўрганувчи Pantone институтининг маълумотларига қараганда, классик кўк нафақат ёзда, балки бошқа мавсумларда ҳам долзарб бўлади. Ушбу рангдаги универсал ва минимал услубдаги кийимларни оқ, олов ранг ёки сариқ билан мослаб ўзига хос услубда кийининг.