Trendda bo‘lish uchun ortiqcha pul sarflash shart emas. Bisotingizda boridan foydalanib zamonaviy bo‘lishingiz mumkin

Kiyinish borasidagi trendlar yildan-yilga o‘zgargani bilan bir tamoyil aslo o‘zgargani yo‘q, haqiqiy go‘zallik oddiylik va qulaylikda. Bundan tashqari, zamonaviy bo‘lish bugungi davrga kelib ortiqcha mablag‘ talab qilmaydi, ya’ni siz garderobingizdagi bor liboslarga ayrim detallarni qo‘shish bilan ham trendda bo‘lishingiz mumkin. Buning uchun did va fantaziyani ishga solishning o‘zi yetadi.

Oversize uslubidagi jaketlar

Shkafingizni ochib nazar tashlang, unda ancha vaqtdan beri kiyilmayotgan keng va yelkalari odatdagidan kattaroq, lekin siz o‘tgan zamonga xos deb o‘ylagan jaket bo‘lsa, fikringizni o‘zgartiring. Oversize uslubida kiyinish allaqachon modaga aylangan, biroq bunda me’yorni bilish kerak bo‘ladi. Obrazni sport uslubidagi kiyimlar, krossovka yoki tufli bilan ham moslasangiz bo‘ladi. Ortiqcha printsiz oddiy ko‘ylak va ustidan retro uslubidagi jaket va – siz trenddasiz. Bu hali hammasi emas, bunday libosda sizni harakatlanishingiz juda qulay bo‘lib, ertalabdan-kechgacha o‘zingizni erkin his qilishingiz mumkin bo‘ladi.

Vodolazkalar

Moda bu muayyan rang va hajmga yopishib olish emas, aksincha ularni bir-biriga moslash, ba’zida esa aksincha moslamasdan fantaziya qilish demakdir. Shunday ekan garderobingizda bor bo‘lgan qomatni aks ettiruvchi vodolazkalar sizni didli ko‘rinishingizga yordam beradi. Bunda siz oversize uslubidagi jaket yoki plashning ichidan vodolazkani kiyishingizning o‘zi yetadi. Rangi qanday bo‘lishi ahamiyatsiz, asosiysi ozoda va harakatlanishga xalaqit beradigan darajada tor bo‘lmasligi kerak.

Midi uzunligidagi liboslar

Kalta-kulta kiyish moda bo‘lmay qolganiga ancha bo‘ldi. Moda tamoyillari shuni ko‘rsatadiki, uzun-keng ko‘ylak va krossovka kiyib ham o‘ziga xos tasavvur qoldirishingiz mumkin. Bu borada midi uzunligi, ya’ni tizzadan pastda turadigan ko‘ylak va yubkalar sizga yordam beradi. Bunday uslubdagi libos bilan uzun etik, yozgi poyabzal yoki sport uslubidagi oyoq kiyim kiyishingiz mumkin. Demak endi siz “ko‘ylak bilan tufli kiyishim kerak” degan fikrni xayoldan chiqarib tashlab, garderobingizda bor oyoq kiyimni kiyishingiz va shu bilan trendda bo‘lishingiz mumkin.

Yorqin va och rangdagi detallar

Bahorga xos kiyinish uchun albatta, pushti yoki oq kiyim kiyishingiz yoki xarid qilishingiz shart emas. Agar sizda bor liboslar to‘q rangda bo‘lsa, yangi yorqinidan olishim kerak deb ortiqcha pul sarflab yurmang, shunchaki obrazingizga yorqin rangdagi detal – paypoq, sharf yoki kamar, shlyapa yoki taqinchoq taqing va qarabsizki pul ham cho‘ntakda, siz ham trendda. Bu mavsumda ayniqsa, qizil, sariq ranglar dolzarb. Ranglarni miks qilishdan qo‘rqmang, eksperiment qilib ko‘ring.

Och rangdagi denim

Oddiy oq yoki sutrang jinsining o‘zi sizning bahorgi obrazingiz muvaffaqiyatini ta’minlaydi. Uning o‘zining rangidan top, futbolka yoki jaket kiysangiz total look bo‘lib haddan ortiq darajada chiroyli va didli obraz hosil bo‘lsa, boshqa ranglar bilan moslash va unga yorqin aksessuar qo‘shish, tashqi ko‘rinishingizga o‘ziga xos aksent beradi.

Oq poyabzal

Qora poyabzal hamma vaqtda must have bo‘lgani bilan, ushbu mavsumda oq rangli oyoq kiyimlar yetakchilik qilmoqda. Sizda faqat bir poyabzal xarid qilish uchun yetarli mablag‘ bo‘lsa-yu, oq rangni tez kir bo‘lib qolishidan cho‘chib, tanlashga jasorat qila olmayotgan bo‘lsangiz, sizga layfxak – endi oq poyabzalni tozalash muammo emas, tish yuvish vositasi bilan krossovka va kedalarni tozalasa, yangidek ko‘rinishda bo‘ladi. Qolaversa, do‘konlarda rangsiz gel va kremlar bor.

Soch uchun aksessuar

Sizda faqatgina bir jinsi va oddiy futbolka bo‘lgan tadqirda ham trendda bo‘lishingizga imkon bor. Obrazingizga minimal uslubdagi yoki turli bezaklari bor soch aksessuarlari – obodok yoki zakolkalarni qo‘shsangiz bo‘lgani. Bu kabi detallar street style’ning ajralmas bo‘lagiga aylangani va byuti blogerlar tomonidan oxirgi vaqtlarda tavsiya qilinib kelayotgani sir emas. Yangisi yo‘q bo‘lsa, buvingiz yoki oyingiz sandig‘iga murojaat qiling. Negaki hozir aynan o‘sha davrdagi singari aksessuarlar dolzarb.