Шимолий Осетия (Россия Федерацияси таркибидаги республика) пойтахти Владикавказ шаҳрида изоляция режими сабабли қийин аҳволда қолган аҳоли 20 апрель куни ўтказган оммавий норозиликда ҳуқуқ-тартибот идоралари ходимларининг 13 нафари тан жароҳати олгани туфайли воқеа юзасидан жиноият иши қўзғатилди. Бу ҳақда Россия Тергов қўмитасининг Шимолий Осетия бўйича тергов бошқармаси хабар бермоқда.
Қайд этилишича, ноқонуний намойиш Шимолий Осетия ҳукумати биноси олдида ўтказилган бўлиб, унда 2 мингга яқин киши иштирок этган. Россия гвардияси ва Ички ишлар вазирлиги ходимлари йиғилганларни уларнинг бу ҳаракатлари ноқонунийлиги ҳақида бир неча бор огоҳлантириб, тарқалишни талаб қилган, аммо намойишчилар уларнинг гапига кирмаган.
Шундан сўнг ҳуқуқ-тартибот ходимлари қалқонлари билан уларни итариб тарқатиш чораларини кўрган. Намойишчилар уларга қаршилик қилиб, жисмоний куч ишлатган. Оқибатда ҳуқуқ-тартибот ходимларининг 13 нафарига тан жароҳати етказилган. Уларнинг 5 нафари касалхонага ётқизилган.
Қайд этилишича, ҳозирда жиноятнинг барча ҳолатларини аниқлаш ва унда иштирок этганларни қўлга олиш юзасидан тергов ва тезкор-қидирув тадбирлари олиб борилмоқда. Жиноят иши бўйич тергов ҳаракатлари давом этмоқда.
Эслатиб ўтамиз, намойишчилар билан учрашган Шимолий Осетия раҳбари Вячеслав Битаров республиканинг кам таъминланган аҳолиси ва COVID-19 коронавирус инфекциясининг тарқалиши сабабли ишсиз қолганларга зарур ёрдам кўрсатилишини ваъда берганди.
Шимолий Осетияда маҳаллий ҳокимлик қарорига биноан (айрим истиснолардан ташқари), чакана савдо дўконлари ва бозорлар, умумий овқатланиш корхоналари, гўзаллик салонлари, массаж салонлари, ҳаммомлар, сауналар фаолияти 30 апрелгача тўхтатилган. Шунингдек, жисмоний тарбия ва спорт объектлари, клублар, тўгараклар ва сайёҳлик марказлари вақтинча ёпилган.
Изоҳ (0)