Shimoliy Osetiya (Rossiya Federatsiyasi tarkibidagi respublika) poytaxti Vladikavkaz shahrida izolyatsiya rejimi sababli qiyin ahvolda qolgan aholi 20-aprel kuni o‘tkazgan ommaviy norozilikda huquq-tartibot idoralari xodimlarining 13 nafari tan jarohati olgani tufayli voqea yuzasidan jinoiyat ishi qo‘zg‘atildi. Bu haqda Rossiya Tergov qo‘mitasining Shimoliy Osetiya bo‘yicha tergov boshqarmasi xabar bermoqda.
Qayd etilishicha, noqonuniy namoyish Shimoliy Osetiya hukumati binosi oldida o‘tkazilgan bo‘lib, unda 2 mingga yaqin kishi ishtirok etgan. Rossiya gvardiyasi va Ichki ishlar vazirligi xodimlari yig‘ilganlarni ularning bu harakatlari noqonuniyligi haqida bir necha bor ogohlantirib, tarqalishni talab qilgan, ammo namoyishchilar ularning gapiga kirmagan.
Shundan so‘ng huquq-tartibot xodimlari qalqonlari bilan ularni itarib tarqatish choralarini ko‘rgan. Namoyishchilar ularga qarshilik qilib, jismoniy kuch ishlatgan. Oqibatda huquq-tartibot xodimlarining 13 nafariga tan jarohati yetkazilgan. Ularning 5 nafari kasalxonaga yotqizilgan.
Qayd etilishicha, hozirda jinoyatning barcha holatlarini aniqlash va unda ishtirok etganlarni qo‘lga olish yuzasidan tergov va tezkor-qidiruv tadbirlari olib borilmoqda. Jinoyat ishi bo‘yich tergov harakatlari davom etmoqda.
Eslatib o‘tamiz, namoyishchilar bilan uchrashgan Shimoliy Osetiya rahbari Vyacheslav Bitarov respublikaning kam ta’minlangan aholisi va COVID-19 koronavirus infeksiyasining tarqalishi sababli ishsiz qolganlarga zarur yordam ko‘rsatilishini va’da bergandi.
Shimoliy Osetiyada mahalliy hokimlik qaroriga binoan (ayrim istisnolardan tashqari), chakana savdo do‘konlari va bozorlar, umumiy ovqatlanish korxonalari, go‘zallik salonlari, massaj salonlari, hammomlar, saunalar faoliyati 30-aprelgacha to‘xtatilgan. Shuningdek, jismoniy tarbiya va sport obyektlari, klublar, to‘garaklar va sayyohlik markazlari vaqtincha yopilgan.
Izoh (0)