«Пандемиядан кейин дунё асл ҳолига қайтмайди». Павел Дуров коронавирусдан кейинги ҳаёт ҳақида

«ВKонтакте» ижтимоий тармоғи ва Telegram мессенжери асосчиси Павел Дуров коронавирус пандемиясидан кейин дунё сивилизацион силжишга дуч келиши мумкинлигини айтди. Бу ҳақда у ўзини Telegram каналида ёзиб қолдирди.

Павел Дуров коронавирус тарқалишини бутун инсоният учун таҳдид, деб атади. «Пандемия тугаганда дунё нормал ҳолатга қайтмайди. Яқин вақтларда пайдо бўладиган янги дунё биз ортда қолдираётгандан яхшироқ бўлиши ўзимизга боғлиқ», — деган у.

Дуров изоляцияни ўзимизни ислоҳ қилиш учун, технологияларга эса ўз аҳамиятини кўрсатиш учун яхши имконият, деб ҳисобламоқда.

Мессенжер асосчиси Telegram шу ойда 17 та давлат Соғлиқни сақлаш вазирликларининг каналларига верификация (расмий белги) бериб, ривожлантира бошлаганини маълум қилди. Улар орасида Ўзбекистонда коронавирус ҳақида расмий маълумот берувчи Koronavirus Info канали ҳам бор.

Шунингдек, Telegram ҳукумат билан ҳамкорлик қиладиган компания эмаслигини, бироқ коронавирус ҳақида маълумот тарқатишда давлатга ёрдам бериш учун муайян ҳолатда истисно қилинганини таъкидлаган.

Бундан ташқари, Telegram бунга қўшимча тарзда ўзини яккалаш вақтида таълим олишни осонлаштирувчи лойиҳани тақдим этишини маълум қилди. Дуров тез орада лойиҳа ҳақида қўшимча маълумот беришни ваъда қилди.

Жонс Ҳопкинс университети маълумотига кўра, дунёда коронавирусга чалинганлар 2,5 миллиондан ошди. Энг кўп касалланиш АҚШ, Испания, Италия, Францияда қайд этилган. Бутун дунёда коронавирусдан 177,2 киши вафот этган, 665 мингдан ортиқ бемор тузалган.