АҚШда коронавирус эпидемиясининг иккинчи тўлқини биринчисидан ҳам хатарли бўлиши мумкин. Бу ҳақда Касалликларни назорат қилиш ва профилактика маркази (CDC) директори Роберт Редфилд The Washington Post нашрига берган интервьюсида айтиб ўтди.
«Мамлакатга бу йил қишда ҳужум қиладиган вирус оқибатлари биз яқинда босиб ўтганимиздан ҳам оғирроқ бўлиши мумкин», — деган у. Редфилд коронавируснинг янги тўлқини мавсумий грипп эпидемиясига тўғри келиши мумкин, деб ҳисоблайди.
Унинг фикрича, бир вақтнинг ўзида нафас олиш касалликларининг икки тури тарқалиши соғлиқни сақлаш тизимига тасаввур қилиб бўлмайдиган юк келтириб чиқариши мумкин. Федерал ҳокимият ва АҚШ штатлари раҳбарияти яқин икки ойни келажакда икки эпидемия пайдо бўлиши эҳтимолига тайёргарлик кўришга сарфлаши керак.
Хусусан, ёзда соғлиқни сақлаш масъуллари АҚШ фуқароларига гриппга қарши эмлашнинг аҳамиятини етказиши керак. Бу гриппдан оғир касалланганлар сонини камайтиришга ва касалхоналарда коронавирусга чалинганлар учун жойлар етишига ёрдам беради.
Бундан ташқари, мамлакатда карантин чоралари босқичма-босқич олиб ташланаётганига қарамай, ҳукумат ижтимоий масофаланиш заруратини таъкидлашда давом этиши керак.
Эслатиб ўтамиз, Шанхайдаги пневмонияни даволаш бўйича экспертлар гуруҳи раҳбари Чжан Венхун 2020 йилнинг охиригача коронавирус устидан ғалаба қозониб бўлмаслигини тахмин қилган эди. У 2020 йилнинг ноябрь ойида дунё бўйича коронавируснинг иккинчи тўлқини кузатилиши, бироқ унинг оқибатлари ҳозиргидек оғир бўлмаслигини, иккинчи тўлқиндан соғлиқни сақлаш тизими такомиллашмаган Африка ва Жанубий Америка давлатлари кўпроқ жабр кўришини айтганди.
Аввалроқ Трамп АҚШда коронавирус қурбонлари қанчага етиши мумкинлиги тўғрисидаги прогнозига ўзгартириш киритганди.
Изоҳ (0)