Наманган вилояти юқумли касалликлар шифохонасида 21 апрель, сешанба куни, коронавирус инфекциясига чалинган яна 20 нафар бемор бутунлай соғайди. Бу ҳақда «Дарё» мухбири Азизбек Абдувалиев хабар бермоқда.

Фото: Наманган вилояти соғлиқни сақлаш бошқармаси ахборот хизмати

Тузалганларнинг барчаси Наманган шаҳридан. 19 нафари коронавирус инфекциясига чалинганлар билан мулоқотда бўлган, бир нафари Туркиядан чартер рейс орқали келган.

Беморларнинг 7 нафари — эркаклар, 13 нафари эса аёллар. Энг ёши каттаси 70 да бўлса, энг кичиги 5 ёшда. Улар орасида 2 нафар тиббиёт ходими — шифокор ва ҳамшира ҳам бор.

Фото: Наманган вилояти соғлиқни сақлаш бошқармаси ахборот хизмати

Даволаш муолажаларидан кейинги текширувлар уларнинг хасталикдан халос бўлганини кўрсатди.

Улар вилоят соғлиқни сақлаш бошқармаси масъуллари иштирокида реабилитацияга кузатилди.

Шу тариқа, Наманганда коронавирусдан бутунлай соғайганлар сони 43 кишига етди. Беморларнинг жами сони 158 кишини ташкил этаётганди.

Аввалроқ Ўзбекистонда коронавирусдан тузалганлар сони 293 нафарга етгани ҳақида хабар берилган эди. Бундан ташқари, Ўзбекистонда коронавирусдан яна бир киши вафот этди, қурбонлар сони 6 нафарга етди.

Ўзбекистонда 21 апрель соат 10:00 ҳолатига кўра, коронавирус инфекциясини юқтириб олганлар сони 1657 нафарни ташкил этмоқда. Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.