Гейнрихнинг ўзгача селфиси ҳамда самога қаратилган қўллар. Ўзбекистон терма жамоасининг ЖЧ—2018 3-саралаш босқичидаги барча голлари битта саҳифада (видео)

Коронавирус пандемияси сабаб дунё бўйлаб деярли барча спорт мусобақалари тўхтатилди. Шу жумладан, футбол бўйича мусобақалар ҳам. «Дарё» мухлисларнинг талаб ва таклифларини инобатга олган ҳолда турли мусобақаларда урилган энг сара голларни тақдим этиб боради. Ушбу лойиҳанинг навбатдаги сонида Ўзбекистон терма жамоасининг ЖЧ—2018 учинчи саралаш босқичидаги барча голлари тақдим этилади.

Самвел Бабаян бошчилигидаги Ўзбекистон терма жамоаси ЖЧ—2018 мусобақасининг ҳал қилувчи саралаш босқичини ёмон бошламайди. «Оқ бўрилар» дастлабки тўрт ўйиннинг учтасида ғалабага эришади. Бироқ қолган баҳсларда бор-йўғи битта ғалаба қайд этилади ва Ўзбекистон яна мундиал йўлланмасидан қуруқ қолади.

Терма жамоа мазкур босқичда умумий ҳисобда олтита гол уради ва ўз дарвозасидан еттита тўп олиб чиқади. Ушбу саҳифада Ўзбекистон терма жамоаси футболчилари томонидан урилган барча голларни томоша қилинг.

Александ Гейнрих | 1-тур | Ўзбекистон—Сурия 1:0

Учинчи саралаш босқичнинг илк ўйинида Ўзбекистон ўз майдонида Сурияни қабул қилади. Унда ўша вақтлари «сеҳрли таёқча»га айланган Александр Гейнрих томонидан киритилган ягона гол ўйин тақдирини ҳал қилади. Ўнг қанотда Сервер Жепаров бошлаб берган ҳужумни Элдор Шомуродов давом эттиради ва жарима майдонига ёриб кирган ҳолда марказ томон узатмани амалга оширади. Одил Аҳмедовнинг кучли зарбасини рақиб посбони қайтариб қолади, бироқ Гейнрих томонидан йўлланган мукаммал зарба дарвозадан жой олади. Саша эса голни ўша машҳур селфи билан нишонлайди.

Егор Кримец | 2-тур | Қатар—Ўзбекистон 0:1

Барчаси дуранг томон кетаётган бир вақтда Егор Кримец 86-дақиқада Гейнрих томонидан узатиб берилган тўпни боши билан дарвозага аниқ йўналтиради. Эътиборлиси Гейнрих бу сафар ҳам захирадан майдонга тушиб, самарали ҳаракат амалга оширади. 2016 йилнинг 6 сентябрь куни бўлиб ўтган ўйиндаги мазкур гол Ўзбекистоннинг Биринчи Президенти, марҳум Ислом Каримов хотирасига бағишланади.

Марат Бикмаев | 4-тур | Ўзбекистон—Хитой 2:0

Ўзбекистон 3-турда Эрондан учралган мағлубиятдан беш кун ўтиб Хитойни қабул қилади. Унда Марат Бикмаев ва Отабек Шукуров томонидан критилган голлар Бабаян шогирдларига ғалаба келтиради. Ўзбекистон терма жамоаси 3-саралаш босқичи доирасида фақатгина шу ўйинда биттадан ортиқ гол уришга муваффақ бўлади.

Шомуродовнинг узатмасидан кейин Марат Бикмаев узоқ бурчакни аниқ нишонга олган ҳолда 50-дақиқада жамоасини олдинга олиб чиқади.

Отабек Шукуров | 4-тур | Ўзбекистон—Хитой 2:0

Ўйиннинг асосий вақти якунланишига беш дақиқа қолганида Отабек Шукуров иккинчи голни киритади. Унинг узоқ масофадан йўллаган зарбасидан кейни тўп ҳимоячига тегиб ўз йўналишини ўзгартиради ва дарвозадан жой олади.

Марат Бикмаев | 5-тур | Жанубий Корея—Ўзбекистон 2:1

5-тур доирасидан ўрин олган Жанубий Кореяга қарши ўйин Ўзбекистон учун жуда омадли бошланади: 25-дақиқада мезбонлар ҳимоясидаги хатодан кейин Бикмаев узоқ масофадан бўш дарвозани ишғол қилган ҳолда ҳисобни очади. Бироқ Бабаян жамоаси иккинчи бўлимдаги оддий вазиятларда ўз дарвозасидан тўп олиб чиқади ва ғалабани қўлдан чиқаради. 67 ва 85-дақиқаларда урилган голлар корейсларга уч очко келтиради.

Одил Аҳмедов | 7-тур | Ўзбекистон—Қатар 1:0

Ўзбекистон учун жуда қулай ва омадли рақиб ҳисобланган Қатар терма жамоаси бу сафар ҳам таслим этилади. 65-дақиқада Одил Аҳмедов жарима зарбасини мукаммал ижро этган ҳолда ўзбекистонликларни олдинга олиб чиқади.

Афсуски, кейинги уч турда Ўзбекистон терма жамоаси бирорта ҳам гол ура олмайди. Эрон ўз майдонида имконият қолдирмаган бўлса (2:0), Хитойдан 84-дақиқада гол ўтказиб аламли мағлубият қайд этилади. Сўнгги турда эса Жанубий Кореяга қарши нурсиз дуранг бутун Ўзбекистоннинг тўрт йиллик умидларини яна пучга чиқаради...