Қозоғистонда яна 7 нафар тиббиёт ходимида COVID-19 аниқланди
Қозоғистоннинг Олмаота шаҳрида жойлашган Болалар юқумли касалликлар шифохонасининг 6 нафар ходими, шунингдек, Шаҳар марказий клиник касалхонасининг ходимида коронавирус инфекцияси аниқланди. Бу ҳақда «Informburo.kz» хабар берган.
«Инфекцияга қарши стационар даволаш муассасаларида коронавирус инфекциясини юқтириб олган 427 нафар бемор, жумладан, олмаоталик аёл ҳам даволанмоқда. Беморларнинг уч нафари ўта оғир, олти нафари оғир, 121 нафари ўртача оғирликдаги ҳолатда, қолганларининг ҳолати қониқарли», — дея хабар берган шаҳар соғлиқни сақлаш бошқармаси.
Шаҳар бўйича коронавирусдан тузалганлар сони 84 нафарга етган.
«278 нафар одам вақтинчалик даволаш жойларида, 341 киши карантин изоляторларида ва 9678 нафар фуқаро уй шароитидаги карантинда бўлиб турибди», — дейилади бошқарма ҳисоботида.
Қозоғистон Республикаси бош санитар врачи Айжан Есмагамбетова 17 апрель куни мамлакатда коронавирусни юқтириб олган тиббиёт ходимларининг сони 423 нафарга етгани, уларнинг 53 фоизи Олмаотада, 33 фоизи Нур-Султонда ва 23 фоизи Чимкентда эканини маълум қилган.
Шаҳар марказий клиник касалхонасининг ўзида COVID-19 юқтириб олганларнинг сони 182 нафарни ташкил қилаётганди. Касалланган тиббиёт ходимларининг муайян қисми ИИВ санаторийсига олиб кетилган, айримлари касалхонанинг ўзида қолган. Шунингдек, касалхонада 215 нафар бемор ҳам қолгани ва уларнинг COVID-19’га тест қилингани айтилганди. Муассаса карантинга ёпилган.
Қозоғистонда 19 апрель ҳолатига кўра, 1676 нафар одамда коронавирус инфекцияси қайд этилган, 401 нафар киши касалликдан тузалган, 17 нафар бемор инфекция туфайли ҳаётдан кўз юмган.
