Навоийда БАА компанияси ҳисобидан янги фотоэлектрик станция қурилади

Президент 14 апрель куни «Навоий вилоятида умумий қуввати 100 МВт бўлган фотоэлектрик станция қуриш» инвестиция лойиҳасини амалга ошириш чора-тадбирлари тўғрисидагини қарорни имзолади.

Norma’нинг хабар беришича, умумий қуввати 100 мегаваттли ушбу фотоэлектрик станцияни лойиҳалаштириш, молиялаштириш, қуриш ва ишлатиш бўйича тажриба-синов лойиҳасини амалга ошириш учун инвестор танлаб олиш жараёни якунланди.

Тендер Жаҳон банки гуруҳи тартиб-таомилларига мувофиқ ўтказилган ва Abu Dhabi Future Energy Company PJSC – Masdar (БАА) компанияси ғолиб деб топилган. Инвестициялар ва ташқи савдо вазирлиги у билан инвестиция битими, «Ўзбекистон миллий электр тармоқлари» АЖ эса электр энергиясини сотиб олиш тўғрисида битим тузди.

Ўзбекистонда инвестиция лойиҳасини амалга ошириш учун лойиҳа компанияси – инвестор номидан иш юритадиган «Nur Navoi Solar» МЧЖ таъсис этилди.

Инвестор ишлаб чиқарилган электр энергиясини қатъий тариф – 1 киловатт/соат учун 2,679 доллар миқдорида (тариф инвестиция лойиҳасининг бутун 25 йиллик муддати давомида хорижий валютада деноминацияланган) ягона харидор – «Ўзбекистон миллий электр тармоқлари» АЖга сотиш мажбуриятини олди. Тўлов маҳаллий валютада амалга оширилади.

Шунингдек, араб компанияси кучланишни оширувчи ФЭС подстанциясини қуриши ва фойдаланишга топширилгандан кейин уни «Ўзбекистон миллий электр тармоқлари» АЖга бепул асосда бериши шарт.

Инвестор ва лойиҳа компаниясининг мажбуриятлари 20 миллион доллар миқдоридаги банк кафолати билан таъминланади. «Ўзбекистон миллий электр тармоқлари» АЖ электр энергиясини 6 ой мобайнида сотиб олишни қоплаш учун инвестор фойдасига хорижий валютада тасдиқланган тикланадиган аккредитив очади.

Аввалроқ Ўзбекистонда БААнинг ушбу компанияси билан ҳамкорликда шамол электр станциялари қурилиши хабар берилган эди.