Қашқадарё вилоятининг Деҳқонобод туманида яшовчи ҳомиладор аёл ҳамда кўричак билан оғриган бемор вертолётда шифохонага олиб борилди. Бу ҳақда «Дарё»га вилоят Фавқулодда вазиятлар бошқармаси ахборот хизмати раҳбари Соҳиб Ваитов маълум қилмоқда.
Маълумот берилишича, Деҳқонобод тумани «Оққишлоқ» МФЙ Шахшор қишлоғида яшовчи 21 ёшли ҳомиладор аёл Ҳулкар Нормўминованинг тоби қочиб, ҚВПга олиб борилган. ҚВП шифокори аёлда эрта туғруқ ҳолати кузатилаётганини, тиббиёт масканида аёлга ёрдам кўрсатиш имкони йўқлигини айтган.
Шунингдек, кўричак билан оғриган 29 ёшли фуқаро Шаҳло Қурбонова ҳам операцияга муҳтожлигини билдирган.
Аммо беморлар туман марказидан 180 километр узоқликдаги қишлоқда яшаши ва йўлдаги муаммолар сабаб уларни туман тиббиёт бирлашмасига олиб боришда муаммо юзага келган.
Мазкур ҳолатдан хабар топган Деҳқонобод туман тиббиёт бирлашмаси раҳбари Фармон Жалилов вилоят соғлиқни сақлаш бошқармаси бошлиғи Дониёр Шодиевга хабар берган.
Вилоят Фавқулодда вазиятлар бошқармаси бошлиғи, полковник Обит Ҳазратқулов ташаббуси билан ҳомиладор аёл ва кўричак билан оғриган бемор 16 апрель, пайшанба куни, Мудофаа вазирлигига қарашли вертолёт ҳамда экипаж ёрдамида Қарши шаҳридаги Хонобод аэродромига олиб келинган.
Вилоят перинатал марказига ётқизилган Ҳулкар Нормўминова ҳамда шошилинч тез тиббий ёрдам илмий маркази вилоят филиалига ётқизилган бемор Шаҳло Қурбоноваларнинг айни пайтдаги аҳоли яхши. Улар шифокорлар назоратидалиги айтилмоқда.
Изоҳ (0)