Қозоғистонда, Қарағанда яқинида, МиГ-31 самолёти ҳалокатга учради. Бу ҳақда Қозоғистон Мудофаа вазирлиги ахборотига таяниб «Informburo.kz» хабар қилган.
«Қозоғистон Мудофаа вазирлигининг МиГ-31 самолёти 2020 йил 16 апрель куни режадаги парвозни жанговар навбатчиликни амалга оширишга тайёрланаётган вақтда Қарағанда яқинида ҳалокатга учраган», — дейилади Қозоғистон Мудофаа вазирлигининг хабарида.
Вазирлик бу борада қўшимча маълумот бермаган. Маҳаллий ОАВ хабарларига кўра, МиГ-31 қирувчи самолёти аэропорт ҳудудига қулаган. Самолётнинг экипаж аъзоларига талафот етмаган.
«Тахмин қилинишича, учувчилар: Гаврилко И.В. ҳамда штурман Курмангалиев А.С. катапульта қурилмасини ишлатишга улгурган. Ҳарбий вертолёт экипажни Қарағанда шаҳрига етказиб қўйган», — дейилади «КазТАГ» агентлигининг хабарида.
МиГ-31 ҳалокати маҳаллий вақт билан тахминан соат 19:03 да Қарағанда аэродроми қўниш жойидан 10 километр узоқликда содир бўлган. Қулашга самолётнинг ўнг томонида жойлашган двигателида кузатилган носозлик сабаб бўлиши мумкин. Воқеа жойига Қарағанда аэропортининг авария-тиклаш хизмати ходимлари ҳамда ҳарбий қисм вакиллари етиб келган.
Эслатиб ўтамиз, 2019 йил 27 декабрда Қозоғистонда 95 йўловчиси бўлган самолёт қулаган, кейинчалик авиаҳалокатга учраган Bek Air самолёти қурбонларининг оилаларига 4 миллион тенгедан маблағ ажратилган, 30 декабрда Олмаота халқаро аэропорти Bek Air самолёти ҳалокати хронологиясини эълон қилган, шу куни мамлакат ички ишлар вазири Bek Air самолётининг фалокатига сабаб бўлган версияларни маълум қилган.
Изоҳ (0)