Ёдгор Саъдиев «Шайтанат»нинг якунловчи қисми қачон ва қаерда намойиш этилишига аниқлик киритди

15 апрель куни «Шайтанат» сериалининг якуний 21-қисми Zo‘r TVда намойиш этилмади. Телеканалнинг 15 апрелга мўлжалланган теледастурлари рўйхатидан «Шайтанат» сериали ҳам жой олганди. Бироқ соат 20:00 дан бошлаб америкалик киноижодкорларнинг «Панжара ортида» сериали намойиш этилишни бошлади.

«Дарё» мухбири Миролим Исажонов сериалнинг нима сабабдан эфирга узатилмаганига аниқлик киритиш мақсадида «Шайтанат» режиссёри ва продюсери, Ўзбекистон халқ артисти Ёдгор Саъдиев билан боғланди.

«‘Шайтанат’нинг 20 та қисми Zo‘r TVда намойиш қилинишидан аввал ‘Оқ шомлар’ номли кўрсатувда махсус телепремьера ўтказдик. Мен ўша кўрсатувда сериал 21-қисм билан тугайди, деб айтгандим. Аммо шунга қарамай баъзи одамлар асоссиз гап-сўзлар тарқатишяпти. ‘Шайтанат’нинг 22, 23 ва 24-қисмлари ҳам бор эканлиги, шунчаки, миш-миш холос. Томошабинларга яна бир бор айтаман, ‘Шайтанат’ 21-қисм билан якунланади.

Кўпчилик кутаётган 21-қисм эса ҳали тайёр эмас. Карантиндан кейин монтаж ва овоз бериш жараёнларини охиригача етказамиз. Сўнгра Алишер Навоий номли киносаройда актёрларни йиғиб, премьера қилиб берамиз», — дейди Ёдгор Саъдиев.

Ўзбекистон халқ ёзувчиси Тоҳир Маликнинг «Шайтанат» асари ўтган асрнинг 90 йилларида дунё юзини кўрган ва ўн беш йилдан ортиқ вақт мобайнида жами бешта китоб миллионлаб нусхада чоп этилган эди.

Ёдгор Саъдиев раҳбарлигидаги «Қалқон» студияси томонидан ишланган «Шайтанат» сериали намойиши бошланганидан сўнг кўп ўтмай тўхтаб қолган ва бунинг сабаби расман изоҳланмаган эди. Сериал 20 йил давомида телевидениеда қўйилмаганди. Сериал воқеалари ўтган асрнинг 80 йилларида бўлиб ўтади ва ундаги қаҳрамонларнинг барчаси тўқима образ экани айтилган.

2016 йилда берган интервьюсида Ёдгор Саъдиев турмуш ўртоғининг руҳини шод этиш учун 21-қисм устидаги ишларни якунлаб қўймоқчи эканлигини айтганди.

«Бундан бир неча йил илгари ‘Шайтанат’нинг 21-қисмини суратга олиб қўйгандик, монтаж қилинмаганди. Турмуш ўртоғим ‘Шуни охирига етказинг’, деб ўзи ҳам кўрмай кетди. Ҳозир унинг шу илтимосини бажаряпман. Монтаж тугади, энди овозлаштириш ишларини ниҳоясига етказсак, унинг илтимосларидан бирини бажарган, руҳини шод қилган бўламан», — деганди Ёдгор Саъдиев.

2019 йилда берган интервьюсида Ёдгор Саъдиев 21-қисм якуний қисм бўлишини айтганди.