Ўзбекистон Халқ таълими вазирлиги уйда якка тартибда таълим олишни ташкил этиш тартиби ҳақида маълумот берди.
Қайд этилишича, уйда якка тартибда таълим олиш ХТВ ва ССВнинг «Жисмоний ёки психик ривожланишида нуқсони бўлган ҳамда узоқ вақт даволанишга муҳтож болаларнинг уйда якка тартибда таълим олишларини ташкил этиш тартиби тўғрисидаги низомни тасдиқлаш ҳақида» 2015 йил 30 июндаги қарорига асосан жисмоний ёки психик ривожланишида нуқсони бўлган, узоқ вақт даволанишга муҳтож ва тиббий кўрсатмаларга кўра доимий ёки вақтинча умумий ўрта таълим муассасаларига қатнай олмайдиган болалар учун ташкил этилади.
Ўқувчиларнинг таълим олиш ҳуқуқини таъминлаш мақсадида мактабнинг тегишли синфида ўқиётган болалардан икки ёшга катта ўқувчиларни ҳам ушбу синфда уйда якка тартибда таълим олишга жалб қилишга рухсат этилади.
Уйда якка тартибда таълим беришнинг асосий мақсади ўқувчиларнинг таълим олишга бўлган ҳуқуқларини таъминлаш ҳамда уларнинг таълим олишлари учун зарур шароит яратишдан иборат. Бунинг учун мактаб директорлари мактаб жойлашган ҳудудда яшайдиган ўқувчиларни аниқлайди, рўйхатга олади ҳамда уларни уйда якка тартибда таълим олиш учун жалб қилиш чораларини кўради.
Ўқувчини уйда якка тартибда таълим олишини белгилаш унинг доимий яшаш жойидаги туман (шаҳар) даволаш-профилактика муассасаларида фаолият кўрсатаётган тиббий-маслаҳат комиссиясининг тиббий хулосасига асосан туман (шаҳар) халқ таълими бўлими томонидан амалга оширилади.
Эслатиб ўтамиз, 16 мартдан коронавирус сабаб Ўзбекистондаги барча таълим муассасалари карантинга ёпилган эди. Шу сабабли мактаб ўқувчиларининг таътил пайтида билим олиши учун видеодарс машғулотларини тайёрлаш ва уни тасвирга олиш бўйича соҳа ходимларидан иборат ташкилий-ижодий гуруҳ тузилди ва 30 мартдан бошлаб телевидение орқали дарслар бериб бориш бошланди.
Изоҳ (0)