АҚШ хусусий лабораторияларида одамларнинг COVID-19 коронавирусини юқтириб олганини аниқлаш бўйича ўтказилаётган тестлар сони охирги бир ҳафта давомида мамлакатнинг турли штатларида касалликка чалиниш ҳолатлари кўпайганига қарамай 30 фоизга қисқарган. Хусусий тадқиқот марказлари аввал катта юкламага дош бера олмаган бўлса, энди таҳлил учун топширилган намуналарни кутиб ўтирибди, дея хабар берган Politico.
Quest Diagnostics АҚШдаги энг асосий иккита клиник лабораториялардан бири, муассаса март ойи охирида ходимларининг кунига 160 мингта тестни текширишга улгурмаганини билдирганди, ҳозирда улар кунига 45 мингта тестни таҳлил қилаётган бўлса ҳам марказ тўлиқ қувват билан ишлаётгани йўқ.
Тестлар сонининг кескин қисқаришига АҚШ касалликлар назорати ва профилактикаси марказлари томонидан таҳлил мезонларининг қайта кўриб чиқилгани сабаб бўлиши мумкин. Ушбу мезонларнинг охирги эълон қилингани ва айни пайтда ўз кучида бўлган нусхасида тест қилиш, аввало, касалхоналарга ётқизилган беморларда, соғлиқни сақлаш ва коронавирус юқтириб олиш эҳтимоли баланд бўлган аҳоли вакиллари, масалан, ёши кекса одамларда амалга оширилиши белгиланган. Бироқ ушбу чекловлар бошқа аҳоли гуруҳларининг етарли даражада эътиборга олинмаётганини англатмоқда.
Аҳолини кенг қамровли тест қилиш америкалик амалдорлар карантин шартларини енгиллаштириши ва ёпиб қўйилган муассасаларнинг очилишига рухсат бериши учун зарур деб ҳисобланмоқда. Тестлар сонининг қисқаргани шундоқ ҳам оғир вазиятни янада мураккаблаштирмоқда.
Айни кунларда Оқ уйнинг коронавирус масалалари бўйича ишчи гуруҳи тестлар бўйича мазкур меъёрларни соддалаштириш устида бош қотирмоқда. «Ушбу масала биз муҳокама қилаётган долзарб муаммолардан бири, уни ҳал этиш юзасидан иш олиб борилмоқда», — деган АҚШ озиқ-овқат маҳсулотлари ва санитар назорат бошқармаси раҳбари Стивен Хан.
Мавзуга доир:
Изоҳ (0)