АҚШда ўтган бир сутка ичида 2228 нафар бемор коронавирус оқибатида вафот этди. Бу ҳақда Жонс Ҳопкинс университети маълумотларига келтирилган.
Сўнгги маълумотларга кўра, бутун АҚШ ҳудудида коронавирус билан касалланганлар сони 609 407 кишига етган, қурбонлар сони 25,9 мингдан ошиб кетди. Шу билан бирга, 48,1 мингдан ортиқ одам даволанишга муваффақ бўлган.
Бутун дунё бўйлаб коронавирус билан касалланганлар сони 1,9 миллион кишидан ошиб кетди. Уларнинг 485 мингдан ортиғи даволанишга муваффақ бўлган, 126,5 мингдан ортиқ одам вафот этган.
10 апрель куни АҚШда коронавирус қурбонлари сони бўйича кунлик антирекорд янгиланиб, бир суткада 2 мингдан ортиқ бемор вафот этганди. Шундан сўнг кетма-кет тўрт кун давомида қурбонлар сонида пасайиш кузатилди.
Аввалроқ АҚШ президенти Дональд Трамп Жаҳон соғлиқни сақлаш ташкилотини молиялаштириш тўхтатилганини эълон қилганди. Америка етакчисининг фикрича, ташкилот ўзининг асосий вазифасини бажара олмаган ва бунинг учун жавоб бериши керак. АҚШ давлат котиби Майк Помпео эса келажакда коронавирус пандемиясининг айбдорлари топилиши кераклигини айтди ва Хитой ушбу касаллик ҳақида вақтида хабар бермаганини таъкидлаган эди.
Ўзбекистонда 15 апрель соат 10:00 ҳолатига кўра, коронавирус инфекциясини юқтириб олганлар сони 49 кишига ошиб, 1214 нафарни ташкил этмоқда. Мамлакатда коронавирусга чалиниш билан боғлиқ илк ҳолат 15 март куни тасдиқланган бўлса, ўтган вақт давомида коронавирус юқтириб олгани аниқланган тўрт бемор вафот этди, 99 нафари эса соғайиб, реабилитацияга олинди.
Изоҳ (0)