Россия Сенати Путин видеомурожаатининг Google’дан ўчириб ташланиши сабабини ўрганади

Россия Федарациясининг давлат суверенитетини ҳимоялаш бўйича комиссияси президент Владимир Путиннинг коронавирус шароитида фуқароларга йўллаган мурожаатининг Google’дан ўчириб ташлангани бўйича ўрганиш ўтказади. Бу ҳақда комиссия раиси Андрей Климовга таяниб, «РИА Новости» хабар берди.

«Эски танишимиз Google ҳам ушбу шароитда ўзини кўрсатди. У ерда видеосюжетлар йўқола бошлаган. Жумладан, Россия президентининг фуқароларга йўллаган мурожаати ҳам сирли равишда ғойиб бўлган», – дея таъкидлаган Климов комиссиянинг 14 апрелда ўтказилган мажлисида.

Бундан ташқари, Google россиялик шифокор-вирусологларнинг пандемия шароитида нималар бўлаётгани ҳақида фуқароларга маълумот тарзида йўллаган мурожаатларини ҳам ўчириб ташлаган. Климовнинг айтишича, компанияга мурожаат қилиниб, ушбу ҳолатлар юзасидан тушунтириш сўралганидан кейин шифокорлар ҳақидаги ваидеоматериаллар яна ўз ҳолига қайтарилган.

«Комиссия ушбу ҳолатларни чуқур ва жиддий ўрганиб чиқиши лозим», – деган Климов.

Шунингдек, Сенат вакили сенаторларда ушбу платформа билан ишлаш тажрибаси борлиги, аввал ҳам Россияда амалдаги қонунларни бузиш ёмон оқибатларга олиб келиши борасида Google’га тушунтириш ишлари олиб борилганини эслатган.

13 апрель куни «Роскомнадзор» Google’дан НТВ телекомпаниясининг YouTube’даги каналидан Россия президенти Владимир Путиннинг коронавирус пандемияси сабаб фуқароларга йўллаган мурожаатининг ўчириб ташлангани юзасидан изоҳ талаб қилганди. «Роскомнадзор» сўровида видеохостингнинг ушбу ҳаракати Россия конституциясининг 29-моддаси 5-бандининг бузилиши экани эслатилган.