Карантин сабабли Ўзбекистонда пенсия тўловларини босқичма-босқич банк карталари орқали тўлаш жорий қилиниши ҳақида хабар берилган эди. АОКА ҳузуридаги штабда бўлиб ўтган брифингда Марказий банкнинг Жамоатчилик билан алоқалар ва коммуникацион сиёсат департаменти директори ўринбосари Акмал Назаров карантин даврида пенсия пулларини пластик карталарда олиш масалалари бўйича саволларга жавоб берди.
Акмал Назаровнинг қайд этишича, карантин шароитида нақд пулдан кўра пластик картадан фойдаланиш ҳам хавфсиз, ҳам самарали йўл ҳисобланади.
Қайд этилишича, Республика махсус комиссияси тавсиясига асосан, аҳолига иш ҳақи ва пенсия тўловларини банк карталари орқали амалга ошириш чоралари кўрилмоқда.
Унга кўра, пенсия тўловларини амалга ошириш:
- 2020 йилнинг май ойидан бошлаб Тошкент ва Нукус шаҳарлари ҳамда барча вилоятлар марказларида истиқомат қилувчи аҳолининг пенсия тўловлари банк карталари орқали амалга оширилади;
- кейинги ойлардан бошлаб ушбу чора-тадбирлар босқичма-босқич қолган ҳудудларда давом эттирилади.
Мавзуга доир: Ўзбекистонда карантин вақти доимий яшаш жойида турмаган пенсионерларга пенсия қандай тўланиши маълум қилинди
Халқ банкининг масъул ходимлари томонидан ушбу карталар уларнинг эгаларига барча санитар қоидаларига тўлиқ риоя қилинган ҳолда яшаш манзиллари бўйича етказиб берилади.
Халқ банки ходимлари томонидан пенсионерларга ўзларининг банк карталари етказиб берилган вақтда уни расмийлаштириш учун фуқародан фақатгина ариза ва унинг банк картасини қабул қилиб олганлиги тўғрисида имзо сўралади.
Халқ банки банкоматларидан маблағларни нақдлаштириш бепул амалга ошириш мумкин бўлса-да, саломатлик нуқтаи назаридан ва айниқса, бугунги кунда тўловларни банк карталари орқали амалга ошириш тавсия этилади.
Шунингдек, Акмал Назаров банк офислари мавжуд бўлмаган ҳудудларда ва банк хизматларидан фойдаланиш масаласида ҳам саволларга жавоб берди.
Қайд этилишича, бугунги кунда барча асосий банк амалиётлари, шу жумладан, хорижий валютани сотиб олиш ёки сотиш, пул ўтказмаларини амалга ошириш, депозит операциялари, коммунал хизматлар ёки солиқ тўловларини амалга ошириш ва бошқа турдаги банк хизматларидан масофадан туриб, яъни уйдан чиқмаган ҳолда, мобил банк иловалари орқали фойдаланиш имконияти яратилган.
Таъкидланишича, деярли барча банкларнинг мобил иловалари шундай функцияга эга. Бу функцияни топиш учун банк мижози ўзига хизмат кўрсатадиган банкнинг мобил иловаси билан танишиб чиқиши керак.
Марказий банк томонидан банк инфратузилмаси етарли бўлмаган чекка ҳудудларда универсал кассалар ташкил этиш ҳамда аҳоли томонидан мурожаат бўлганда уларнинг яшаш манзилларига бориб банк хизматларини кўрсатиш юзасидан барча банкларга тегишли кўрсатмалар берилган.
Ушбу универсал кассалар аҳолига пул ўтказмалари, хорижий валютани сотиб олиш ёки сотиш бўйича хизматларни тақдим этади.
Шунингдек, банкларнинг мижозлари билан олдиндан келишилган ҳолда тегишли сўровларга биноан вақти-вақти билан маълум жойларга чиққан ҳолда бошқа чакана банк хизматлари ҳам кўрсатилади.
Ўз навбатида, банклар санитария талабларига қатъий риоя қилиши ва ташриф буюрадиган барча ходимларни зарур жиҳозлар (махсус ҳимоя кийимлари, ниқоблар, қўлқоплар ва антисептик воситалар) билан таъминлаши, шунингдек, банк хизматлари кўрсатиб бўлингандан кейин ҳам ходимларни дезинфекция қилиш чораларини кўриши юзасидан талаблар жорий этилган.
Тижорат банклари томонидан валюта операцияларини амалга ошириш учун аҳолига қулай шарт-шароитларни яратиш мақсадида тегишли банк инфратузилмаси яратилган. Нақд хорижий валютани сўмга айирбошлашга ихтисослашган автоматлаштирилган банкоматлар сони яқин келажакда 1000 дан зиёдга етказилади.
Аввалроқ Наманганда пенсия тарқатган Халқ банки ходими коронавирусга чалингани ҳақидаги хабарлар асоссиз бўлиб чиққани, бу ҳақда видео улашган ИИБ ходими ишдан бўшатилгани ҳақида хабар берилганди.
Эслатиб ўтамиз, Нукус ва Тошкент шаҳарлари ҳамда вилоятлар марказларида «ўзини яккалаш» тартиби 6 апрелдан мажбурий тартибда жорий этилди. Унга кўра, 65 ёшдан ошган ҳамда сурункали касаллиги бўлган фуқаролар ўз уйларидан ўта заруратсиз ташқарига чиқиши қатъиян ман этилади.
Изоҳ (0)