Шавкат Мирзиёев 14 апрель, сешанба куни, глобал инқироз ва пандемия шароитида Ўзбекистон қишлоқ хўжалиги олдида турган долзарб вазифалар муҳокамасига бағишланган видеоселектор йиғилиши аввалида коронавирус инфекциясига қарши кураш доирасида мамлакатда амалга оширилаётган ишларга яна бир бор алоҳида тўхталиб ўтди. Бу ҳақда Президент матбуот хизмати хабар бермоқда.
Давлат раҳбари, хусусан, Республика комиссияси мутасадди вазирлик ва идоралар билан бирга жойлардаги ҳокимлар, секторлар раҳбарларининг коронавирус тарқалишининг олдини олиш ҳамда унинг иқтисодиёт ва инсонлар ҳаётига салбий таъсирини имкон қадар чеклаш учун масъулиятини янада ошириш чораларини кучайтириши кераклигини таъкидлади.
«Айниқса, ҳокимлар ва сектор раҳбарлари аҳолининг энг муҳим ҳаётий эҳтиёжларини тўлиқ таъминлаш, нарх-навонинг ошиб кетмаслигига эришиш ва кам таъминланган оилаларни қўллаб-қувватлаш борасидаги ишлар самарадорлиги учун шахсан жавоб беради.
Айни пайтда кам таъминланган, эҳтиёжманд ва ёрдамга муҳтож оилаларга мурувват ва саховат кўрсатиш, уларнинг ҳолидан хабар олиш, бу каби эзгу ташаббусларни кўпайтириш жойлардаги барча мутасадди раҳбарларнинг асосий вазифаларидан бири бўлмоғи лозим», — деди Президент.
14 апрель ҳолатига кўра, Ўзбекистонда коронавирусга чалинганлар сони 1113 кишига етди, берморларнинг 99 нафари бутунлай соғайди, тўрт киши касалликдан вафот этди.
Изоҳ (0)