Ўзбекистон Транспорт вазирлиги ахборот хизмати раҳбари Наврўз Ашурматов АОКА штабида бўлиб ўтган брифингда мамлакатда авиақатновлар қачондан бошлаб қайта тикланиши, карантиндаги фуқароларни ўз уйига олиб бориш каби масалалар юзасидан саволларга жавоб берди.
Вазирлик вакилининг таъкидлашича, Президент Шавкат Мирзиёевнинг топшириғига мувофиқ, коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссиясининг қарори билан 30 март куни соат 00:01 дан 20 апрель соат 00:01 га қадар Ўзбекистондаги мавжуд барча аэропортлар ёпилиб, авиақатновлар бутунлай тўхтатилган.
Республикадаги аэропортлар иш фаолияти ва авиапарвозларнинг қайта тикланиши ёки чеклов чораларининг узайтирилиши Республика махсус комиссияси томонидан эълон қилинади.
Наврўз Ашурматовнинг маълум қилишича, 13 апрель куни тунги соат 01:00 да Тошкент вилоятида жойлашган карантин ҳудудидан олиб келинаётган 50 нафар фуқаро йўлда қолдириб кетилгани ҳақидаги хабар юзасидан ўрганиш ишлари олиб борилган. Натижада мазкур хабар мутлақо асоссиз ва ҳақиқатдан йироқ экани ойдинлашган. Шу куни автобус ҳайдовчиси карантин муддати тугаб, уйларига қайтаётган барча йўловчиларни ўз манзилларига қадар етказиб қўйган.
Шу билан бирга, вазирлик вакили 10 апрель куни Тошкент вилояти Юқори Чирчиқ туманида жойлашган карантин ҳудудида бўлган ва уйига жавоб берилган фуқароларни доимий яшаш манзилларига етказиб қўйиш давомида автобус ҳайдовчиси 3 нафар фуқарони ўз манзилига олиб бормаганини ва бунинг учун ҳайдовчига нисбатан маъмурий жавобгарлик жазоси қўлланилганини қайд этиб ўтди.
Таъкидланишича, бу каби салбий ҳолатларнинг олдини олиш мақсадида Тошкент вилояти Юқори Чирчиқ туманида жойлашган карантин ўташ махсус ҳудудида бўлган фуқароларни ўз уйларига етказиб қўйиш учун «Тошшаҳартрансхизмат» АЖ ва Тошкент шаҳар ички ишлар бош бошқармаси билан биргаликда махсус йўналишлар ишлаб чиқилиб, ушбу йўналиш бўйича фуқароларни манзилларига етказилмоқда.
Наврўз Ашурматов ҳозирги кунда ишлаб чиқариш корхонаси учун зарур бўлган маҳсулотни чет элдан буюртма бериб олиб келишда аэропортнинг карго юк хизматидан фойдаланиш масаласида ҳам саволга жавоб берди.
Қайд этилишича, бугунги кунда мазкур хизматдан фойдаланиш мумкин. Ҳозирги кунда бутун жаҳонда короновирус пандемияси туфайли мунтазам авиақатновлар йўловчи ва юк ташуви учун чекланган. Аммо Uzbekistan Airports АЖ тизимига кирувчи Тошкент, Навоий ва Наманган аэропортлари куча-ю кундуз фаолият юритмоқда. Бу аэропортларда юкларни қабул қилиш учун барча шароитлар яратилган.
Мамлакатнинг қолган аэропортлари авиақатнов ташкил қилинишига қараб жадвал бўйича ишламоқда. Юк жўнатувчилар ёки қабул қилувчилар юк ташиш учун керак бўлган ҳужжатлар рўйхатини ва юкка бўлган талабларни аэропортнинг юк ташув бўлимидан ёки авиаташувни бажарувчи авиакомпаниядан олиши мумкин.
Мазкур масала бўйича қўшимча маълумот учун Uzbekistan Airports АЖ тижорат департаменти раҳбари Юра Тянга +99890 3508538 рақами орқали мурожаат қилиш мумкин.
Изоҳ (0)