Жанубий Кореяда бир сутка ичида коронавирусни юқтириб олиш бўйича 32 та янги ҳолат қайд этилди, 125 нафар киши касалликдан тузалди ва мамлакат миқёсида COVID-19 ни юқтириб олганларнинг умумий сони 10 512 нафарга етди. Корея Республикасида 214 нафар одам коронавирус оқибатида вафот этган. Бу ҳақда мамлакат Соғлиқни сақлаш вазирлиги қошидаги Касалликлар назорати ва профилактикаси марказлари ташкилоти (KCDC) маълумотига таяниб, «РИА Новости» хабар берган.
Аввал COVID-19 касаллигидан ҳалок бўлганлар сонининг 211 нафарга етгани ҳақида хабарлар берилганди. Жанубий Корея ҳукумати эпидемиологик хатар даражасини олийгача кўтарган. Тэгу ва Кёнсан-Пукто вилоятининг учта шаҳри фалокатнинг алоҳида ҳудудлари сифатида ажратиб қўйилган. Фуқаролардан 19 апрелгача зарурат бўлмаганда уйдан чиқмаслик сўралган, спорт, кўнгилочар ва диний идора ҳамда ташкилотлар фаолияти тўхтатилган.
KCDC маълумотига кўра, 12 апрель маҳаллий вақт билан соат 00:00 ҳолати бўйича Сеулда 3 та, Тэгуда 2 та, Кёнгидо провинциясида 4 та, Кёнсан-Пукто провинциясида 3 та касалланиш қайд этилган. 24 нафар фуқаронинг касалликни хориждан юқтириб қайтгани айтилмоқда.Ортда қолган бир сутка ичида 125 нафар бемор касалликдан тузалиб, касалхонадан чиқарилган, коронавирусдан тузалганларнинг умумий сони 7368 нафарга етган. 90 нафардан кўпроқ одамнинг организмида улар тузалганидан кейин ҳам вирус сақланиб қолгани кузатилмоқда, KCDC коронавируснинг қайталаш ҳолатлари юзасидан текширувлар ўтказилаётганини маълум қилган.
Бир сутка ичида яна 3 нафар одам коронавирус келтириб чиқарган пневмония оқибатида вафот этган, қурбонларнинг умумий сони 211 нафарга етди. Тэгу шаҳарида 146 нафар, Кёнсан-Пукто провинциясида 49 нафар, Кёнгидо провинциясида 12 нафар, Сеулда 2 нафар ва Пусанда 3 нафар одам вафот этган. Ульсан шаҳри ва Канвондо провинциясида ҳам қурбонларнинг сони бир нафардан экани айтилган.Жанубий Кореяда коронавирус билан касалланганларнинг 5 минг нафардан ортиғи — «Синчхончжи» диний оқимини тарғиб қилувчи ташкилот аъзолари. Оммавий тўпланишлар оқибатида COVID-19 ни юқтириб олганлар умумий соннинг 81,7 фоизини ташкил қилади. Камида 910 та ҳолатда фуқаролар коронавирусни хорижда юқтириб, мамлакатга қайтган.
10 апрель куни Жанубий Кореяда бир суткада 27 кишида коронавирус аниқлангани, эпидемия маркази бўлган Тегу шаҳрида бирорта ҳам янги ҳолат қайд этилмагани ҳақида хабар берилганди.
Изоҳ (0)