Украина президенти Владимир Зеленский коронавирусга қарши вакцинани яратишнинг уддасидан чиққан украиналик олимга 1 миллион доллар миқдорида мукофот ваъда қилди. Бу ҳақда мамлакатнинг бош санитар врачи Виктор Ляшко Украинанинг «Левому берегу» нашрига берган интервьюсида айтиб ўтган, деб ёзмоқда «РБК».
«Сизларга бир сирни очаман. Президент мендан мамлакатдаги академикларга хат ёзишимни ва улар орасидан кимдир вакцина ёки дорини ярата олса, қандайдир бир жамғармадан камида бир миллион доллар миқдорида мукофот беришини айтди», — деган Ляшко.
Шифокорнинг сўзларига кўра, айни кунларда Украинада ҳафтасига 30 минг нафар одамдан коронавирусга тест қилинмоқда, келажакда 80 минг нафар одамни текшириш кўзда тутилган.
Украина Соғлиқни сақлаш вазирлигининг маълум қилишича, мамлакатда коронавирусни юқтириб олганлар сони 2,7 минг нафардан ошган. Шундан 83 нафари вафот этган, 89 нафар киши эса касалликдан тузалган.
Зеленский апрель бошида Украинада коронавируснинг тарқалишини Чернобилдаги АЭСдаги ҳалокатга қиёслаганди. Украина президенти хавфнинг кўринмас экани, бироқ жуда катта ҳалокатдан дарак бераётганини қайд этган.«Ўшанда ҳам ҳеч ким қўрқмаган, сабаби радиация ҳам кўзга кўринмайди. Афсуски, коронавирус ҳам кўринмас», — деган Зеленский фуқароларга вазиятга тўғри баҳо беришни илтимос қилиб йўллаган мурожаатида.
Ҳозирча бутун дунёда COVID-19 га қарши дори ёки вакцина ҳали ҳам яратилгани йўқ: препаратларнинг тадқиқотлари бир нечта хориж давлатларида, жумладан, АҚШ, Хитой ва Францияда ўтказилмоқда. Россияда 60 нафар кўнгилли танлаб олинган ва улар «Вектор» илмий марказида дастлабки синовларда иштирок этади. Олимларнинг ўзи ҳам май ойида ўтадиган синов жараёнида қатнашади ва препаратни ўз организмида ҳам синовдан ўтказади.
Изоҳ (0)