Коронавирус юқтириб олган чироқчилик 14 ёшли беморнинг 158 нафар қишлоқдоши икки ҳафталик карантин муддатини ўтаб, уйига қайтди. Бу ҳақда «Дарё»га вилоят кўп тармоқли тиббиёт маркази бош шифокори Тўлқин Расулов маълум қилмоқда.
Маълум бўлишича, жорий йилнинг 12 апрель куни 84 нафар ва 13 апрель куни 74 нафар — жами 158 нафар фуқаро Қарши шаҳридаги вилоят кўп тармоқли тиббиёт марказидан уйига кузатилган.
Таъкидланишича, карантиндан чиққанларнинг барчаси Чироқчи туманининг Зум қишлоғида яшовчилар бўлиб, 14 ёшли беморда касаллик кузатилгач, карантинга олинган эди.
«Карантинда Зум қишлоғида яшовчи яна 10 нафар фуқаро бор. Улар 158 нафар фуқародан кейин олиб келингани учун 2-3 кундан кейин карантин муддатини тугатиб, уйига қайтарилади. Карантинга олинганлар текширилганда барчаси соғлом эканлиги маълум бўлди», — дейди Тўлқин Расулов.
Қўшимча қилинишича, вилоят кўп тармоқли тиббиёт марказида 215 нафар фуқаро карантинга олинган бўлиб, шундан 168 нафари Чироқчи туманининг Зум қишлоғидан, 19 нафари эса туманнинг Қизилчовра қишлоғидан. Қолган 21 нафар фуқаро эса дастлабки карантинга олинганларни қўриқловчи ходимлар.
Карантиндан чиққан фуқаролар вилоят ҳокимлиги томонидан ташкил этилган автобусларда манзилига кузатилган. Эндиликда уларнинг барчаси маълум муддат тиббий кузатувда бўлади.
Эслатиб ўтамиз, жорий йил 30 март куни коронавирус инфекцияси аниқланган 145-бемор Чироқчи туманининг Зум қишлоғида яшовчи 14 ёшли бемор эканлиги маълум қилингач, касаллик унинг 36 ёшли отаси ва 16 ёшли опасида ҳам аниқланди. Сўнгра яна бир опаси ва укаси ҳам касалликни юқтириб олгани маълум бўлди.
Изоҳ (0)