Ўзбекистонда пенсия тўловларини босқичма-босқич банк карталари орқали тўлаш жорий қилинади. Бу бош вазири ўринбосари Жамшид Қўчқоров, Марказий банк раиси Мамаризо Нурмуратов ва молия вазири Тимур Ишметов томонидан 13 апрель куни имзоланган, тегишли идора ва ташкилотлар ҳамда тижорат банкларига нақд пул муомаласини қисқартириш бўйича қатор вазифалар белгиланган қўшма хатда белгиланган.
Унга кўра, пенсия тўловларини устувор равишда банк карталари орқали тўлаш, буни энг аввало 2020 йил май ойидан бошлаб Тошкент, Нукус шаҳарлари ва вилоятлар марказларида тўлиқ жорий этиш вазифаси топширилган. Ундан кейинги ойлардан бошлаб эса Ўзбекистоннинг барча худудларда пенсия тўловларини устувор равишда банк карталари орқали тўланиши таъминланади.
Қайд этилишича, Халқ банки томонидан Пенсия жамғармасининг худудий бўлимларидан тегишли маълумотларни олган ҳолда, пенсионерларга банк карталари очилади. Банк ходимлари томонидан навбатдаги пенсия тўловларини тарқатиш жараёнида пенсионерларга банк карталари барча санитар талабларга риоя қилган ҳолда уларнинг яшаш манзиллари бўйича етказиб берилади.
«Карта эгасининг хоҳишига кўра, картадаги маблағлар нақдлаштириб берилади. Босқичма-босқич барча маҳалла фуқаролар йиғинлари бинолари олдида банкноматларни жойлаштириш ишлари ташкил этилади», — дея хабар бермоқда @bankers_uz. Қўшма хатда Давлат солиқ қўмитасига савдо нуқталарини барча турдаги (Uzcard ва Humo) тўлов терминаллари билан таъминланганлигини ҳамда уларнинг узлуксиз ишлашини қаттиқ назоратга олиш вазифаси юклатилган.
Қўшимча қилинишича, Ички ишлар вазирлиги, Мудофаа вазирлиги, Миллий гвардия тизимидаги ташкилотларнинг ишчи-ходимларига иш ҳақи тўловларини тўлиқ банк карталари орқали тўлаш чоралари кўрилади.
Изоҳ (0)