Наманганлик тадбиркорларнинг карантин шароитида қийналган эҳтиёжманд оилалар учун йўналтирган ёрдамнинг умумий суммаси 1 миллиард сўмдан ошди. Бу ҳақда «Дарё» мухбири Азизбек Абдувалиев хабар бермоқда.
Жорий йил март ойи охирида тузилган тадбиркорлар саховат жамғармасига 100 дан ошиқ ишбилармон ҳисса қўшди. Жамғарма кенгаши томонидан ҳисоб рақами очилиб, унга ҳомийлик маблағлари қабул қилиб олинди. Шунингдек, пластик картадан пул кўчирганлар, озиқ-овқат маҳсулотлари келтирганлар, транспорт воситаларини тақдим этганлар бўлди.
—Жамланган маблағга эҳтиёжманд оилалар учун зарур ун, ёғ, гурунч, макарон, тухум, шакар, картошка каби 11 турдаги маҳсулот харид қилинмоқда. Наманган шаҳар ҳомийлик хайрияларини мувофиқлаштириш марказига келиб тушган мурожаатлар асосида улар ҳар куни шаҳардаги маҳаллаларга юборилади, — дейди тадбиркор, шаҳар кенгаши депутати Зайниддин Ҳожиакбаров.
Ҳисоб-китобларга кўра, бугунги кунгача жамғарма волотёрлари томонидан Наманган шаҳридаги 102 та маҳаллада жойлашган жами 5192 та хонадон йўқланган.
Улар орасидан нафақат эҳтиёжманд оилалар, балки касалхоналар ва карантин ҳудудларида қолаётган шифокор ва ҳамширалар, «Меҳр-1» ва «Меҳр-2» операциялари доирасида хориждан қайтарилган фуқаролар бор.
Изоҳ (0)