Бугун, 12 апрель куни Тошкентдаги Вирусология илмий-текшириш институти клиникасида икки ҳафта давомида коронавирус инфекциясига қарши курашган бир гуруҳ тиббиёт ходимлари навбатдаги гуруҳ билан ўрин алмашди. Бу ҳақда Соғлиқни сақлаш вазирлиги хабар берди.
Таъкидланишича, 29 март куни навбатчиликни қабул қилиб олган тиббиёт ходимларини кузатиш маросимида соғлиқни сақлаш вазири Алишер Шодмонов ҳам иштирок этган.
«Тиббиёт ходимларига Алишер Шодмонов томонидан чуқур миннатдорчилик изҳор этилиб, улар юксак эҳтиром билан реабилитацияга кузатилди. Эндиликда улар ўрнида навбатдаги фидойи тиббиёт ходимлари фаолият бошлашади», — дейилади хабарда.
Маълум қилинишича, мазкур клиника жамоаси саъй-ҳаракатлари туфайли шу кунгача жами 37 нафар коронавирус инфекциясига чалинган бемор бутунлай соғайган. Айни пайтда бу ерда 112 нафар беморга шифокорлар томонидан халқаро стандартлар асосида самарали даволаш муолажалари олиб борилмоқда.
Қайд этиш жоиз, коронавирусдан зарарланган беморлар билан мулоқотда бўладиган, беморлар жойлаштирилган объектларда ҳамда коронавирусни аниқлаш лабораторияларида фаолият олиб бораётган тиббиёт, санитария-эпидемиология хизмати ва бошқа ходимларга ҳар 14 кунлик фаолият даври учун Президент томонидан махсус қўшимча рағбатлантириш тўлови белгиланган.
Унга кўра, врач ходимларга, врач-лаборантларга — 25 миллион сўм; ўрта тиббиёт ходимларига, ҳамшира-лаборантларга — 15 миллион сўм; кичик тиббиёт ходимларига — 10 миллион сўм; бошқа ходимларга — 5 миллион сўм. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўм тўланади.
Шунингдек, коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Мавзуга доир:
Изоҳ (0)