ФИФА президенти Жанни Инфантино коронавирус туфайли юзага келган танаффус ва футбол мавсуми давом эттирилиши борасида фикр билдирди.
«Бизнинг мусобақалар энг аввало инсон саломатлигини биринчи ўринга қўяди, бу ташкилотнинг энг олий вазифаси ва принципи. На бирор ўйин, на мусобақа ва на лига биргина инсон ҳаёти билан таваккал қилишга арзимайди. Ҳар бир киши буни аниқ тушуниб олиши керак. Вазият 100 фоиз хавфсиз бўлмаган тақдирда мавсумни давом эттириш масъулиятсизлик бўлади. Хавфсизликни таъминаламай туриб мавсумни қайтадан бошлаб бўлмайди.
Агар кичик танаффус зарур бўлса, бу ишни қилишимиз керак. Таваккал қилгандан кўра оз муддат кутган афзал», — дейди Инфантино.
Инфантинонинг таъкидлашича, сўнгги тўрт йилда олиб борилган ишлар самараси ўлароқ, ФИФА молиявий жиҳатдан яхши ҳолатда ва керакли вақтда ёрдам кўрсатишга тайёр.
«ФИФА молия бозорида яхши ишламоқда... Бироқ бизнинг захира ФИФАнинг пуллари эмас. Бу пуллар футболга тегишли. Шу сабаб, футбол муҳтож бўлиб қолган вақтда биз ёрдам бериш ҳақида ўйлашимиз даркор. Бу ташкилотнинг масъулияти ва қарзи», — дея қўшимча қилди ФИФА раҳбари.
Эслатиб ўтамиз, дунё бўйича деярли барча мамлакатлар футбол лигалари коронавирус сабаб тўхтатилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)