Ўзбекистонда «онлайн туризм» ва «масофавий спорт» ривожлантирилади, деб хабар бермоқда Туризмни ривожлантириш давлат қўмитаси матбуот хизмати. Бу ҳақда бош вазир ўринбосари, Туризмни ривожлантириш давлат қўмитаси раиси Азиз Абдуҳакимов маълум қилган.
Унинг айтишича, Ўзбекистонда карантин ва ўз-ўзини изоляция қилиш режими ҳукмрон бўлса ҳам, қўл қовуштириб ўтириш керак эмас, аксинча, ушбу сокинлик давридан унумли фойдаланиб, соҳаларни ривожлантиришда янгидан янги усуллар ва жиҳозларни қўллаш лозим.
«Айни дамда Туризмни ривожлантириш давлат қўмитаси ва унинг ҳузуридаги Миллий ПР маркази Ўзбекистонда туризм бўйича виртуал саёҳатларни амалга ошириш имконини берувчи online-tourism.uz сайтини йўлга қўйиш устида ишламоқда. Бу Ўзбекистон бўйлаб виртуал саёҳат қилиш имконини тақдим этувчи биринчи платформа бўлади», — дейди у.
Азиз Абдуҳакимовнинг таъкидлашича, режага кўра ушбу сайт асосан уч йўналишни қамраб олади:
Сайёҳлар учун. У Ўзбекистон бўйлаб виртуал турларни амалга ошириш имконини беради.
Туристик соҳа вакиллари учун. Меҳмонхоналар эгалари ва менежерлари, туроператорлар, меҳмон уйлари, гидлар ва бошқалар билан ҳамкорлик кучайтирилиб, соҳани янада ривожлантиришга оид ишлар амалга оширилади. Платформа ёрдамида дунёдаги сўнгги трендлар, янгиликлар бўйича вебинарлар, онлайн мушоҳадалар йўлга қўйилади, онлайн қўлланмалар тақдим этилади. Инқироз ва ундан кейинги даврда уларнинг бандлиги таъминланади.
Туризмга оид янги лойиҳаларни амалга оширишни истаган стартаперлар учун. Бунда туризмни ривожлантиришга оид янги лойиҳалар, стартаперлар ҳақидаги маълумотлар жамланади, онлайн маслаҳат бериш йўлга қўйилади. Креатив ғояларга эга кишиларга лойиҳаларни амалга ошириш учун грантлар ажратилиши режалаштирилган.
Азиз Абдуҳакимовнинг билдиришича, «масофавий спорт» доирасида Жисмоний тарбия ва спорт вазирлиги билан бирга Ўзбекистоннинг тажрибали спорт усталари ва мураббийлари иштирокида турли видеороликлар ишлаб чиқилмоқда. Уларнинг карантин даврида жисмоний фаолликни сақлаб қолиш, спорт билан боғлиқ фаолиятни бошлашга доир маслаҳат ва тавсиялари берилмоқда.
Шунингдек, ижтимоий тармоқларда турли қизиқарли челленжлар ва беллашувлар ўтказилмоқда. Жисмоний тарбия ва спорт вазирлиги 6—26 апрель кунлари #UydaQol! #HayotgaQo‘shil! челленжини йўлга қўйди. Унда қатнашиш учун карантин даврида уйда оила аъзоларингиз билан бирга бадантарбия ва спорт машғулотларини бажариш, сўнгра уни видеога олган ҳолда ижтимоий тармоқлардаги саҳифаларга жойлаш ҳамда Жисмоний тарбия ва спорт вазирлигининг расмий саҳифалари билан улашиш талаб этилади. Ҳар 4 кунда 3 кунлик ғолиблар аниқланиб, вазирлик томонидан тақдирлаб борилади.
Аввалроқ Ўзбекистон дунёда коронавирус тарқалгани туфайли тахминан бир миллиард доллар йўқотиши мумкинлиги хабар берилган эди. Вазирлар Маҳкамасида бош вазир ўринбосари Азиз Абдуҳакимов бошчилигида мамлакатга коронавирус кириб келиши ва тарқалишининг олдини олиш бўйича республика махсус комиссияси аъзолари иштирокида ўтказилган видеоселектор йиғилишида мутасадди ташкилотлар томонидан коронавируснинг туризм соҳасига салбий таъсирини камайтириш бўйича тегишли таклифлар ишлаб чиқилганди.
Президентнинг «Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида»ги фармонига кўра, туроператорлар, турагентлар ва туризм соҳасида меҳмонхона хизматлари (жойлаштириш хизматлари) кўрсатувчи субъектлар юридик шахслардан олинадиган ер солиғи ва юридик шахсларнинг мол-мулкига солинадиган солиқни тўлашдан озод қилинган.
Изоҳ (0)