Президент Шавкат Мирзиёев 10 апрель, жума куни, Туркий тилли давлатлар ҳамкорлик кенгашининг коронавирус инфекцияси тарқалишига қарши курашишда ҳамкорликни кучайтириш ва саъй-ҳаракатларни бирлаштириш учун видеоанжуман тарзида ўтказилган навбатдан ташқари саммитида иштирок этди. Бу ҳақда Президент матбуот хизмати хабар берди.
Озарбайжон Республикаси президенти Илҳом Алиев раислигида ўтган тадбирда, шунингдек, Туркия Республикаси президенти Ражаб Тоййиб Эрдўғон, Қирғизистон президенти Сўронбой Жээнбеков, Қозоғистон президенти Қосим-Жўмарт Тўқаев, Туркманистон президенти Гурбангули Бердимуҳамедов, Венгрия бош вазири Виктор Орбан ҳамда кенгаш бош котиби Баҳдат Амреев, шунингдек, Жаҳон соғлиқни сақлаш ташкилоти (ЖССТ) бош директори Тедрос Адан Гебрейесус иштирок этди.
Кун тартибига мувофиқ, пандемияга қарши курашиш борасида мамлакатларда кўрилаётган биринчи навбатдаги чора-тадбирлар тўғрисида фикр алмашилди. Томонлар эпидемиологик назоратни таъминлаш, аҳолининг ижтимоий ҳимояга муҳтож қатламларини муҳофаза қилиш, мураккаб шароитда иқтисодиёт тармоқлари ва бизнесни қўллаб-қувватлаш бўйича амалга оширилаётган комплекс тадбирлар тўғрисида маълумот берди.
Коронавирусга қарши курашишда тажриба ва энг намунали амалиёт алмашиш мақсадида яқиндан ҳамкорлик қилиш, савдо-иқтисодий, инвестиция ва транспорт-коммуникация соҳаларидаги қўшма лойиҳаларни мувофиқлаштириш ва қўллаб-қувватлаш муҳим экани таъкидланди, дейилади хабарда.
Аввал Шавкат Мирзиёев Туркий кенгашнинг коронавирусга қарши курашга бағишланган видеосаммитида иштирок этиши ҳақида хабар берилганди.
Изоҳ (0)