Қирғизистонда коронавирус билан касалланган яна бир бемор вафот этди. Бу ҳақда мамлакат соғлиқни сақлаш вазири ўринбосари Мадамин Каратаевга таяниб, «Kloop.kg» хабар берди.

Фото: Қирғизистон Соғлиқни сақлаш вазирлиги

Маълумотларга кўра, 87 ёшли бемор Новқат туманидаги касалхонада вафот этган.

10 апрель ҳолатига кўра, Қирғизистонда яна 18 кишида коронавирус аниқланган: Бишкек ва Чуй вилоятларида — олти нафардан, Аламедин ва Тўқмоқ туманларида — бир нафардан. Жалолобод вилоятида уч кишида коронавирус аниқланган — икки нафари Сузоқ туманида ва бир нафари Жалолобод шаҳрида. Касалланиш бўйича яна бир ҳолат Иссиқкўл вилоятида қайд этилган.

Бутун мамлакат бўйлаб коронавирус билан касалланганлар сони 298 кишига етган. Беморларнинг 154 нафарини аёллар ташкил этаётган бўлса, 144 нафари — эркаклар. Коронавирус билан касалланганларнинг асосий қисми Ўш вилояти ҳисобига тўғри келмоқда (98 киши). Жалолободда 89 кишида коронавирус аниқланган бўлса, Бишкекда 42 киши вирусни юқтириб олган. Баткен ва Иссиқкўлдаги беморлар сони — 5 кишидан.

Аввалроқ Қирғизистонда коронавирус билан касалланган беморларнинг беш нафари реанимацияда эканлиги маълум қилинганди.

Эслатиб ўтамиз, Қирғизистоннинг бутун ҳудуди бўйлаб фавқулодда ҳолат режими жорий этилган. Мамлакат пойтахти Бишкек ва бошқа ҳудудларда коронавирус сабаб бир қатор тақиқлар қўйилган.