Олий Мажлис Сенати Бюджет ва иқтисодий ислоҳотлар масалалари қўмитаси раиси ўринбосари Одилжон Иминов интернет нашрлари ва ижтимоий тармоқларда кенг муҳокамага сабаб бўлаётган Давлат солиқ қўмитаси томонидан тақдим этилган янги қўшма қарор лойиҳасининг айрим мунозарали жиҳатларига тўхталиб ўтди. Бу ҳақда Сенат матбуот хизмати хабар берди.
Эслатиб ўтамиз, Давлат солиқ қўмитаси ва Марказий банки бошқарувининг «Ўзбекистон Республикаси Марказий банки ва тижорат банклари томонидан банк ҳисоб варақларига оид ахборотларни Давлат солиқ қўмитасига электрон узатиш тартиби тўғрисидаги низомни тасдиқлаш ҳақида»ги қўшма қарори лойиҳасига кўра, Ўзбекистонда жисмоний шахсларнинг пластик карталаридаги маблағлар ҳақида солиқ идораларига хабар бериш тизими жорий этилиши мумкин.
Таъкидланишича, Солиқ кодексининг 134-моддасига кўра банк мижознинг банкдаги ҳисоб варақлари ва омонатлари (депозитлари) мавжудлиги, уларнинг қолдиқлари, кўчирмалари, солиқ мажбуриятларини бажариши билан боғлиқ бошқа маълумотларни солиқ органининг сўровига биноан тақдим этиши керак.
Лекин муҳокамага қўйилган ҳужжатда бир ой давомида жисмоний шахсларнинг барча банк карталарига келиб тушган пул маблағлари айланмаси 30 миллион сўмдан (шу жумладан, чет эл валютаси миллий валюта эквивалентида бўлган тақдирда) ва транзакциялари сони 10 тадан ошган операциялари тўғрисидаги ахборотларни банклар солиқ идораларига тақдим этиши белгиланмоқда.
«Солиқ кодексининг 134-моддасида жисмоний шахсларнинг банк карталарига келиб тушган пул маблағларининг айланмаси тўғрисидаги маълумотлар ўз ифодасини топмаган. Ўз-ўзидан кўриниб турибдики, муҳокамага қўйилган ҳужжатга Солиқ кодексида назарда тутилмаган меъёрлар киритилган. Шу боис кенг муҳокамага сабаб бўлаётган ҳужжатни Солиқ кодексига асосан қайта кўриб чиқиш лозим», — дейди Иминов.
Мавзуга доир: Солиқ қўмитаси картадаги пул айланмаси ҳақида ахборот олиш борасидаги ўз ташаббусини изоҳлади
Изоҳ (0)