Ўзбекистон Марказий банки карантин даврида пенсионер доимий яшаш манзилида бўлмаса ёки вақтинча рўйхатда турган жойда яшаса, унга пенсия маблағларини етказиш тартибини маълум қилди.
Маълум қилинишича, пенсия тўлови учун қайднома (ведомост)лар пенсия олувчининг яшаш манзили бўйича Пенсия жамғармасининг туман (шаҳар) бўлимлари томонидан махсус дастур орқали Халқ банкининг тегишли филиалларига жўнатилади.
Ушбу қайдномаларга асосан пенсия маблағлари мазкур филиалга молиялаштирилади ва филиал ходимлари томонидан уларни олувчиларига шахсни тасдиқловчи ҳужжатлар асосида қайдномага имзо қўйдирган ҳолда нақд шаклда тўлаб берилади.
Карантин даврида Халқ банки томонидан пенсия тўловлари пенсионерларнинг яшаш манзилига етказилмоқда.
Шунингдек, фуқаро вақтинча истиқомат қилиб турган манзилида вақтинча рўйхатда турган бўлса, ушбу ҳудуддаги Пенсия жамғармасининг бўлимига пенсия тўловларини у вақтинча яшаб турган ҳудуд бўйича тўлов қайдномасига (манзилларини аниқ кўрсатган ҳолда) киритиш ва молиялаштиришни сўраб, мурожаат қилиши мумкин.
Марказий банк пенсия пулларини нақд шаклда олаётган пенсионерларга Халқ банкининг шахсий пенсия-овердрафт карталарини очиш ва келгусида пенсия маблағларини банк карталарига ўтказишни тавсия этмоқда.
Бу орқали пенсионерлар қуйидаги қулайликларга эга бўлади:
- пенсионер қаерда бўлишидан қатъи назар пенсия маблағлари ойнинг дастлабки кунларида пенсия-овердрафт картасига тушади;
- кейинги пенсия тўловигача пули тугаб қолган тақдирда, пенсионер ойлик пенсиясининг 50 фоизигача фоизсиз овердрафт кредити олиши мумкин;
- картадаги маблағларга йиллик 8 фоиз миқдорида даромад ҳисобланиши билан бир қаторда, уларни Халқ банкининг банкоматлари орқали фоизсиз нақдлаштириш имконияти яратилган.
Изоҳ (0)