Навоий вилояти Кармана туманида карантин қоидаларини бузган ҳолда ўз уйида қиморхона ташкил қилган 50 ёшли фуқарога нисбатан жиноий иш қўзғатилди. Бу ҳақда Навоий вилояти ИИБ хабар берди.

Фото: Навоий вилояти ИИБ

Маълум қилинишича, 2020 йилнинг 8 апрель куни кечки пайт Навоий вилояти ИИБ ходимлари томонидан олинган тезкор маълумотларга асосан Кармана тумани ҳудудида тезкор-профилактик тадбир ўтказилган. Тадбир давомида Навоий вилояти Кармана тумани Каловот МФЙда истиқомат қилувчи 1960 йилда туғилган Ф.М. ўз хонадонида қиморхона ташкил этгани аниқланган.

Бундан ташқари, Ф.М. ўйинга 4 нафар таниши — П.Б., А.Ж., О.Э. ҳамда В.Ш.ни жалб этган ҳолда, карантин қоидаларини бузгани аниқланган. Улар пул эвазига қимор ўйнаш жараёнида далилий ашёлар билан қўлга олинган.

Маълум қилинишича, қимор ўйини даврасида тикилган умумий қийматдаги 3 712 500 сўм пул маблағи ҳамда 7 дона ўйин қарталари далилий ашё сифатида ҳужжатлаштириб олинган. Шунингдек, В.Ш. бошқарувида бўлган Damas автомашинаси жарима майдончасига жойлаштирилган.

Фото: Навоий вилояти ИИБ

Мазкур ҳолат юзасидан ўз хонадонида қиморхона ташкил этганлиги сабабли, Ф.М. Жиноят кодексининг 278-моддаси (Қимор ва таваккалчиликка асосланган бошқа ўйинларни ташкил этиш ҳамда ўтказиш) асосида, қимор ўйинининг иштирокчилари бўлган П.Б., А.Ж., О.Э. ҳамда В.Ш. Маъмурий жавобгарлик тўғрисидаги кодекснинг 191-моддаси (Қимор ва таваккалчиликка асосланган бошқа ўйинлар) ҳамда 54-моддасига (Эпидемияларга қарши кураш қоидаларини бузиш) асосан тегишли тартибда жавобгарликка тортилди.

Аввалроқ Навоийда карантин вақтида ўз уйини дискотекага айлантирган ёшлар жаримага тортилгани ҳамда Учқудуқда карантин қоидаларини бузиб, олтин қазиш билан рухсатсиз шуғулланган 26 киши ушлангани ҳақида хабарлар берилган эди.