Президент Шавкат Мирзиёев 10 апрель куни Туркий тилли давлатлар ҳамкорлик кенгашининг коронавирус тарақалишига қарши курашишда умумий саъй-ҳаракатларни мувофиқлаштиришга бағишлаб видеоанжуман тарзида ўтказиладиган навбатдан ташқари саммитида иштирок этади.
Президент матбуот хизматининг хабар беришича, тадбир ташкилотда раислик қилаётган Озарбайжон ташаббуси билан ташкил этилмоқда.
Унда Туркий кенгашга аъзо бешта давлат — Озарбайжон, Қозоғистон, Қирғизистон, Туркия ва Ўзбекистон раҳбарлари, шунингдек, Туркманистон президенти ва Венгрия бош вазири иштирок этиши кўзда тутилган.
«Видеоанжуманга Жаҳон соғлиқни сақлаш ташкилотининг бош директори Тедрос Адан Гебрейесуснинг ҳам уланиши кутилмоқда», — дейилади Президент матбуот хизмати ахборотида.
Кун тартибига мувофиқ, томонлар коронавирус пандемияси тарқалишига йўл қўймаслик борасида амалга оширилаётган биринчи навбатдаги чора-тадбирлар юзасидан фикр алмашади.
Мавзуга доир:
Global эпидемиологик инқироз шароитида савдо-иқтисодий, инвестиция ва транспорт-коммуникация соҳаларидаги ҳамкорликнинг устувор лойиҳаларини яна-да илгари суриш масалаларига алоҳида эътибор қаратилади.
Туркий кенгашнинг навбатдан ташқари саммити якунида Қўшма декларация қабул қилиниши режалаштирилган.
Изоҳ (0)