Ўзбекистонда 8 апрель куни эсган кучли қорли шамол мамлакатнинг барча вилоятларида дарахтларни йиқитиб, электр таъминотини узиб қўйди, дея хабар бермоқда «Gazeta.uz» «Ҳудудий электр тармоқлари» компанияси матбуот хизматига таяниб.
Сўнгги кунларда Ўзбекистонда об-ҳаво шароити кескин ёмонлашди. 7 апрель куни республиканинг баъзи жойларида ёмғир ёғди. 8 апрель куни ёмғир кучайди, ўша куни кечқурун ва 9 апрелда кечаси республиканинг катта қисмида ёмғир қорга айланди. Фақат Қорақалпоғистон ва Хоразм вилоятида ёғингарчилик кузатилмади.
Мавзуга доир: Баҳорнинг иккинчи ойида Тошкентда ёғган қор – суратларда
«Ҳудудий электр тармоқлари» маълумотларига кўра, камида 63 минг хонадон (6 та вилоят бўйича маълумот) электрсиз қолган. Электр тармоқларидаги авариялардан кўпроқ Самарқанд ва Тошкент вилоятлари аҳолиси азият чекмоқда. Электр тармоқларидан узилиш бўйича хабарлар келишда давом этмоқда — чироқсиз қолган абонентлар сони 150 мингтага етиши мумкин.
«Дарахт шохлари синишинг асосий сабаби — қалин қор ёғиши билан боғлиқ», — дейди компания вакиллари.
«Ҳозир кўп дарахтлар барглаган. Қор тўпланиб қолгани боис дарахт шохлари дош беролмай синган, уларнинг бир қисми электр линияларининг устига қулаган. Биз электр линияларига яқин жойлашган дарахтларнинг шохларини кесган эдик, лекин баҳор фаслида шохлар тез ўсади», — дея тушунтирди «Ҳудудий электр тармоқлари» компанияси.
«Ҳудудий электр тармоқлари» топшириғи билан мамлакатнинг барча ҳудудларида тезкор гуруҳлар электр узатишни қайта тикламоқда.
Тошкент шаҳар экология ва атроф-муҳитни ҳимоя қилиш бошқармаси бошлиғи Нодир Юнусовнинг «Gazeta.uz»га маълум қилишича, шикастланган дарахтлар ҳақидаги биринчи маълумотлар кечга яқин бўлади.
«Ҳозирги вақтда бизнинг инспекторларимиз Ободонлаштириш департаменти ходимлари билан бирга ишлашмоқда. Биринчи навбатда, магистрал йўллар тозаланмоқда, кейин эса маҳаллаларда қулаган дарахтларга навбат келади. Бу ишларга 1—1,5 кун вақт кетади», — деган у.
Ижтимоий тармоқларда автомобиллар устига қулаган дарахтлар суратлари эълон қилинган.
Фавқулодда вазиятлар вазирлиги ахборот хизмати қурбонлар ҳақида маълумотлар келиб тушмаганини маълум қилди.
Изоҳ (0)